بالصورة: أحمد مكي يكشف سر مرضه ب"الفيروس الغامض"

اقتحم الفنان أحمد مكي عالم السوشيال ميديا، بعد غياب طويل حيث قام بتدشين صفحة رسمية باسمه علي موقع التواصل الاجتماعي "فيس بوك"، وكشف من خلال الصفحة سر غيابه عن الساحة الفنية وعدم ظهوره بأي أعمال جديدة مؤخرًا.
وقال أحمد مكي - عبر صفحته ب"فيس بوك"- :"اللي خلاني أعمل الصفحة دي إني لقيت كم ناس سألت عليا لما غبت السنة اللي فاتت و بيستفسروا أنا اختفيت فين ، وكنت حابب أشكرهم على سؤالهم عليا لأنه فعلا فرق معايا نفسيا وكنت محتاجه قوي ".
وأضاف أحمد مكي :" انا كان بقالي سنه تقريبا عيان جداً ، كان عندي ( فيروس ) ضرب لي الكبد و الطحال ... مكنتش حتى اقدر اشرب بق ميه بسبب الطحال ، وكنت في شبه كومه اول شهرين من المرض ، عشان الكبد كان عملي خمول ، كنت بأنام من 18 ل 20 ساعة في اليوم !".
وتابع مكي :"خسيت فوق ال 30 كيلو وكنت شبه فاقد للأمل ، الحمد لله على كل حال ، انا دلوقتي خفيت تماما و وزني زاد تاني ، و اتعلمت كتير جدا في الرحلة دي ، وكان فارق معايا جدا سؤالكم عني ، حسّيت ان ليا أهل مش جمهور ، وإني فرقت معاهم لما غبت ، ربنا يفرح قلوبكم زي ما فرحتوا قلبي ، واهلا بيكم في صفحتي".
وأوضح أحمد مكي أن سبب تسميته لصفحته باسم "سكي ملواني " أنه فوجيء بكم كبير من الصفحات تحمل اسمه وبعضها موثق من "الفيس بوك" رغم أنه لا يعلم عنها أي شيء مما اضطره إلى اختراع اسم جديد ومختلف.