سخرية "فيسبوكية" من العروض الجوية

أثارت عروض الطائرات الحربية بمناسبة الاحتفال بالذكرى ال 38 لانتصارات أكتوبر سخرية المواقع الاجتماعية .
فقد سادت حالة من السخط بين مستخدمي "تويتر" و"فيس بوك" اليوم الخميس حيث تطرق البعض لأصوات الطائرات المفزعة بينما تحدث آخرون عن الأموال المهدرة بسبب العروض الاحتفالية وتناول البعض إغلاق المجال الجوي بسبب العروض.
وقال أحمد صبري فى تعليق على فيس بوك: "البلد فيها أزمة بنزين وانتم عمالين تخمسوا بالطيارات على حساب الشعب، انا ما بدفعش ضرايبي عشان بنزين طيارات العروض الجوية"، فيما قال عبد الرحمن عز:" الشعب هو من يدفع الملايين التي تنفق علي العروض العسكرية للاحتفال في وقت تحتاج فيه مصر الي كل مليم"، وعلق أحمد هادي :" عمو اللوز المسئول عن العرض الجوي،، مش كفاية لعب بقى؟عرفنا انكو جامدين وعندكو طيارات بتعمل شقلباظات، بس كفاية ملايين في الهوا".
وعلق إسلام ابو العزم: "انتم فاكرين هتخوفونا بصوت الطيارات يعني ، الطيارات عمالة تلف علي الفاضي فوق البيوت... فعلا فراغ أصل الفاضي يعمل اكتر من كده واللي معاه قرش ومحيره يطير به طيارات".
وقال باسم طارق ساخراً :" 8 طيارات ورا بعض خرموا وداني، لذلك أعلن: إغلاق المجال الجوي فوق بيتنا وحظر الطيران فوق البيت واللي هيقرب هضربه بالطوب".
وقالت هالة صديق: "احنا كان ممكن نطلع نغلس عالجيش النهارده ونعمل عرض طيارات ورق، والله ونكعبل طيارات الجيش"، وعلى شاكلة فيلم "يا أنا يا خالتي" وأضافت دينا محمد " إيه الطيارات القديمة دى .. دا دخانها بيقطع شكلها منفسة وخربانة".