اسمي وحيد أبو قرن .. واحد فلول كده انما إيه .. حاجة كده على ذوقك .. محسوبك كان دايس ف كووووول حاجة .. لجنة سياسات ماشي .. فساد إداري ماشي .. سرقة وتهريب فلوس البلد ما يضرش .. حضور ماتشات المنتخب كنت ف المقصورة الرئيسية على طول. بس للأسف اليومين دول الحالة نشفت حبتين .. فقررت أكتب مذكراتي وأنشرها على صفحات الجرايد زي النجوم .. يمكن أعرف أقلب من وراها قرشين يساعدوا على تكاليف المعيشة وإيجار الكام قصر العمي اللي حيلتنا ف أوروبا. - يوم السبت 10 مارس 2012 صحيت النهارده الصبح كالعادة، لقيت التليفزيون بيقول إيه، خير اللهم ما اجعله خير، المترشحين للرياسة بيقدموا ورقهم عشان، كفى الله الشر، الانتخابات اللي جاية. قلت لااااااااااااا .. يوم زي ده مايفوتنيش .. فقررت أنزل بنفسي .. وطلعت على مقر اللجنة العليا لانتخابات الرئاسة، ولقيت طابور طوييييييييييل من اللي قال إيه مرشحين عدم اللامؤاخذة، ولقيت فيهم ناس من العيار التقيل ... ناس من العيار الخفيف ... ناس مش عيار من أساسه (مش عارف إيه اللي جابهم) الله يرحمك يا كبيرنا .. قصدي يفك سجنك .. كنت منغنغنا ومدلعنا ومظبطنا ..... قصره .. ضربت بعيني كده شفت مين حبيبنا وعم الشباب والرياسة .. البرنس الارستقراطي التكنوقراطي، اللي ماكانش وطني ديمقراطي، البيه شفيق، ولقيته أول واحد نجز وخلص نفسه، والظاهر إنه هايبقى أول اسم ف كشف السادة المرشحين. بس للأسف .. كملت بعيني كده لقيت بقية الطابور حاجة ماتسرش أبدا .. كل من هب ودب واقفلي ف الطابور عشان يقدم ورقه. شفت المنظر .. افتكرته .. عمنا وحبيبنا .. دعيتله إن ربنا يفك زنقته .. وبعد تفكير عجيب .. عرفت علشان إيه إحنا اخترناه .. وعرفت إن إحنا كنا مرحومين 30 سنة كاملين من لعب العيال ده .. وكان عندنا رئيس مالي مركزه .. وعرفت إن كان له نظرة مبعدية تقدمية واعية لشئون الأفراد ومصالح محدودي الدخل وتانظيم الأسرة والقراءة للجميع .. من أجل رخاء دائم وعدالة في المستقبل القريب. (تصفيق)
