الجوع سياسة ... الشاعر حلمى عمر

وأنا والنهار .. والدار .. وجوعي .. والوجع

الجوع سياسة
----------------
مفتتح
الجوع سياسة .. يازمن
الجوع كفن
بيبعتروا فيه العيال
ويدفّعوا كل اللى جاى
تمن الوطن !!!!!!!
1
عايشين فى عصر اللخبطة
زمن العيال متشحططة
بين وهم جى وسهم فات
زمن البيبان متفندقة لكل الحاجات
والبنات قاعدين عرايا
يحلموا بفرس العريس
والهويس مفتوح يغرق حلمهم
والدوامات كما ندّاهات بتشدهم
2
الحب أصبح مصطبه
يتجمّعوا الشُعرا عليها للسمر
بيفرقوا قصص الهوى على بعضهم
ويجرّحوا فى اللى أنحفر فى قلبهم
ويوزّعوا عاللى بكا واللى انتشا
وأما بيصحى الليل يفرّق جمعُم
الجوع ياخدهم
يبحثوا ... تمن العشا !!!
3
احنا اتفقنا والهوي
ما يقفش مره في وشنا
أصل الهوي لما يداعب في الوشوش
يكشف ويفضح في الرتوش
وتطير ضفاير قلبنا
يتمرد الاحساس علينا .. يذلنا
واحنا غلابة يا زمن
والهوي غالي التمن
وازاي هندفع مهر عشق مالوش دوا ؟؟
واحنا لا زلنا بنستلف .. تمن الوطن !!
4
ياحسرة القلب اللى مُدمن للسهاد
مع كل طلعة صبح بيهز الوجع قلب البلاد
والحزن فارد عالمدا ... يد العدا
خربش تصاوير البراءة
جوّه خيالات الولاد
يالعنة الشعب اليتيم
الجوع مصاحبه فى وحدته
والاب ميّت مالشبع
اربط حزامك ياجدع
وبلاش تئن
العوّادين ... ماسحين تاريخنا اللى اندفن
بايعين غيطان الحلم بشوية عفن
طالقين خيوط العنكبوت
تغزل لنا علم الوطن !!
5
عوّاد ... لامتى العزف لحن الانكسار
وأنا والنهار .. والدار .. وجوعي .. والوجع
داير مدار
بايعين دمانا .. ومرتفع سعر الدولار
يا .. رخص كيلو الدم فى بلادنا الغنية
بكل عار
عنق الزجاجة انفجر
واحنا ولاد الانفجار
نازلين آيات من ربنا
طالعين حكم متقسمة
حبّة شجن .. وعصير مرار
والجوع واخدنا لحتفنا
رغم اننا ...
ملوك في الهزار
----------------------
حلمي عمر