تفاصيل مآساوية عن مرض خطير أصاب الطالب أحمد الخطيب داخل محبسه

الأطباء حددوا المرض بإنه أخطر من سرطان الدم.. والمطالبة أصبحت بخروجه للموت بين أهله وليس العلاج

نزل سقف المطالب التى كانت تطالب بخروج الطالب أحمد الخطيب، المعتقل على ذمة قضايا سياسية، فبعد أن كانت المطالب بتواجده بين أهله وعلاجه من مرض سرطان الدم، أوضحت التحاليل الطبية التى أشرف عليها القصر العينى، أن المرض الذى أصاب الشاب أحمد أخطر بكثير من السرطان، وأصبحت المطالب الآن بخروجه للموت بجوار أهله.
وقال مقربون من الطالب، أن التحاليل التى أجريت أوضحت أنه لا يعاني من سرطان الدم مثلما كان الأطباء يعتقدون وإنما من مرض آخر يسمى "داء الليشمانيا الحشوي" وهو مرض توصف المرحلة النهائية من أعراضه بأنها أبشع من السرطان .
وقالت الناشطة "جهاد حمدي" في تدوينة عبر حسابها ب"فيس بوك": " نتيجة تحاليل أحمد طلعت و ما طلعش عنده لوكيميا (سرطان في الدم).. بس ده مش خبر حلو للأسف .. أحمد طلع عنده مرض خطير و نادر و ملوش علاج هنا و مميت و أسوأ من اللوكيميا لو ما اتعالجش".
وأضافت: "أحمد طلع عنده مرض اسمه (داء الليشمانيا الحشوي) و ده بييجي بسبب الأماكن اللي مش نضيفة و فيها حشرات.. زي السجن.. المرض ده ييدمر المناعة و كرات الدم و الكبد و الطحال و المعدة و نهايته بتبقى الموت .. كل مضاعفات المرض ظهرت عند أحمد من أكتر من 7 شهور" .. مضيفة: "أحمد كان داخل السجن كويس و بسبب ظروف السجن القذرة جاله المرض ده.. ف دلوقتي أحمد بيموت خلاص و مش عايزينه يموت في نفس المكان القذر".
وأردفت: "تقرير قسم الباثولوجي في القصر العيني بيقول إن أحمد حالته متأخرة جداً و مش قادرين يحددوا مدى انتشار المرض أصلاً.. و أي ساعة زيادة أحمد هيقعدها في السجن هتسبب مضاعفات هيبقى نتيجتها حاجه واحده بس.. و هي أن أحمد هيموت".
وتابعت: "احنا مش بنطالب بعلاج أحمد خلاص لأن مرضه في حالة متأخرة و ملوش علاج في مصر.. احنا بنقول خرجوا أحمد يموت برا السجن أو انقلوه مستشفى عشان أحمد مناعته صفر و لو جاله برد حرفياً هيموت أو خرجوه و أهله يسفروه برا يتعالج" .. مضيفة: "أحمد في آخر جواب بعته لمامته كان بيقولها:"خائفٌ أنا.. ليس من المرض و لكن أن أظل هنا و أموت بين جدران هذه الزنزانة البالية و أصبح فقط مجرد رقم في تعداد الموتى.. كما انا الان مجرد رقم هنا .. يرفض عقلي التفكير في أن اموت هنا بعيداً عنك يا أمي و اخوتي..
أخاف أن أموت وحيداً وسط أربع حيطان"
وتابعت: "احنا وصلنا لدرجة بؤس مخليانا نطلب أن ولد عنده 22 سنة يطلع يموت وسط أهله.. ممكن بقى تطلعوا أحمد يموت برا؟ ممكن تدوله عفو صحي و أهله يسفروه يتعالج برا مصر يمكن يمكن يتلحق؟ .. أحمد ما عملش التحاليل دي غير بالضغط اللي حصل و كلام الناس على السوشيال ميديا ف اكتبوا عن أحمد قبل ما نصحى من النوم نلاقيه ميت في السجن" حسب تعبيرها.