تداول عدد من مستخدمي مواقع التواصل الاجتماعي مقطع فيديو لأحد العاملين بالسياحة في شرم الشيخ، وهو يبدي اعتراضه وغضبه من طريقة معالجة حكومة الانقلاب لأزمة السياحة في مصر، ووجه في كلمة لقائد الانقلاب عبدالفتاح السيسي عددا من الحلول التي يرى من وجهة نظره أنها ستساعد في تنشيط السياحة في مصر، خاصة بعد كارثة الطائرة الروسية. وبدأ الفيديو بالشاب وهو يطلب من المصور تصوير فرقة تعزف أغنية «بشرة خير» في أحد شوارع شرم الشيخ كنوع من الفعاليات في إطار تنشيط السياحة، وقال: «صور التطبيل دا، طبعا كله ماسك الطبلة وقاعد يطبل لحد ما هتتقطع لأن مفيش حد فاهم حاجة، تعالى بقى نقول الكلمتين اللي فيهم الفايدة». ثم اتجه إلى داخل أحد المقرات وقال: «أنا اسمي بيبو وشغال في كتاراكت للسياحة، إلى السيد الرئيس السيسي والناس المحترمة، زي ما حضرتك قولت أنا شايف مشاكل مصر وشايف حلها، أنا بقول لحضرتك إحنا شايفين مشاكل السياحة وشايفين حلها، الناس اللي عمالة تطبل بره دي وقوم نادي على الصعيدي وابن خالتي البورسعيدي، دا مش هيرجع السياحة». وأضاف «بيبو»: «من ساعة ما الطيارة ما وقعت كل الإعلام شغال تعالوا عندنا تعالوا عندنا، مصريين بيقولوا لمصريين، يعني أنا بعمل بروباجاندا لأولاد خالتي عشان ييجوا شرم الشيخ، دا مش هيحسن السياحة، إحنا ممكن نعمل حاجة تانية، حضرتك ممكن تبعت ناس كوادر من عندنا بيعرفوا لغات كتير، أنا متعلمتش لغات وبعرف أتكلم 3 لغات، الكوادر دي المفروض تطلع في القناة الأولى الروسية، القناة الأولى الألمانية، يجيبلونا ناس من عندهم مراسلين ييجوا يصوروا يوروا الناس اللي هناك إحنا عايشين كويس ولا لأ، دا بالنسبة للإعلام». وتابع: «بعد كدا الهرم بقى لازم يبتدي من فوق بالنسبة للمنظومة السياحية، كله هنا دلوقتي مش لاقي ياكل، البنوك دي نمرة واحد، الناس اللي فوق دول اللي معاهم الفلوس، ليه ميشيلوش الفوائد اللي على الناس بتوع السياحة، المستثمرين اللي عليهم ملايين، ويتقالهم إنتوا معفيين من الفوائد لمدة سنة، ويجي الراجل اللي اتعفى من الفوائد يقول للمستأجر خلاص أنا هسيبك شهرين أو ثلاثة من غير إيجار، وتبتدي الدنيا تمشي، لكن لما كله يعض في بعضه كدا مفيش حاجة هتتحل». واستكمل: «ثالث حاجة، الطيارة اللي وقعت دي، إحنا جبنا ناس بصوا وخلاص، ولا فكرنا نعملهم أي حاجة ولا تذكار ولا أي حاجة ولا نبني لهم طوبتين ونقول الناس دي ماتت هنا، على الأقل الناس بعد كدا تيجي تشوف أهلهم فين، ونحط صورهم ويبقى مزار سياحي، نبتدي نبقى ناس متحضرين». وقال: «مش همنفضل نطبل هنا على الفاضي، أنا مش عايز ناس تيجي من المنيا ودار السلام يعملوا عندي سياحة، أبقى كداب، أنا عايز أكسب من سياحتي هنا وأنزل للناس دي». وأضاف: «الناس دي عمالة تطبل وخلاص، ومش عارفين ندفع مصاريف العيال بتاعة المدرسة، هنكدب بقى، ونقولك تمام، والسياحة شغالة، واصل إحنا مية مية، لأ مش مية مية، الزبون الروسي بيجي يقعد ب18 دولار يعني مكملش 150 جنيه، الزبون المصري بيجي يقعد ب800 جنيه، هو دا عدل؟، الزبون الروسي بيجي يدفع 400 دولار وبالتقسيط، واسألوا في الكلام ده، الزبون المصري جاي أصلا معهوش 50 دولار في جيبه يصرفهم». وتابع: «أنا مش فاهم ليه دايما التركي واقف بينا وبين السائح الروسي، لازم هو اللي يجيب الزبون الروسي وهو اللي يديهولي، هو ياخد كل حاجة ويديهولي، طب ما أنا أشتغل أنا، وأسوق أنا لبلدي، ليه الفيزا بتاعتنا ب25 دولار، 25 دولار دي مش حاجة، يعني الزبون جاي مصر ويشوف كل الآثار دي ب25 دولار بس، المبلغ دا مبيجبش علبتين سجاير عندهم». واختتم حديثه، قائلا: «ممكن سيادتك، تعفي روسيا لمدة سنة من الفيزا عشان الطيارة اللي وقعت دي، والتانيين الإنجليز والناس اللي عاملين نفسهم بهوات دول تبقى الفيزا ب50 دولار، لازم نفكر شوية في المشاكل اللي إحنا فيها، كفاية تطبيل، الطبلة بتتقطع من التطبيل، بعد كدا مش هنلاقي نصلحها».
