"الحركات الثورية": الإعدام لمبارك و القصاص للشهداء

أصدر عدد من الحركات الثورية بيانا يأكدوا فيه، أن الثورة مستمرة وأنه إن بدا للانقلابيين أنهم قد اغتصبوا السلطة إلى الأبد، فإنهم واهمون، وأن طغيانهم لن يزيدنا إلا إصرارًا للتخلص منهم، وسيكون قريبا -إن شاء الله-.
وإليكم نص البيان:
"الباشوات فكروا أن الثورة دخلت التلاجة .. فكروا أن مبارك ممكن يفلت من الإعدام ويطلع فى زحمة مولد الإرهاب والكباب .. فكروا أنهم ممكن يكملوا الجريمة، وأن زهرة الشباب لازم يبقى مكانهم المقابر علشان يمسك عواجيز مبارك المناصب .. وكأن ثورة 25 يناير لم تقم، وكأن دماء طاهرة لم تراق.
إحنا بنقول بهدوء: لأ .. بنقول بصوت عال: لأ .. بنقول والشوارع بتغلى من جرائم عصابة مبارك: لأ: .. بنقول لمبارك التانى: لأ .. بنقول لقضاة الباشوات الملاكى: لأ .. بنقول لك الحراسة وكهنة المعبد: ألف لأ .. بنقول لأمريكا وعصابة الهيمنة اللى دعمت شلة القتلة والحرامية: مليون لأ.
أيوه اختلفنا كتير .. زعلنا من بعض كتير .. ولكن ثورة 25 يناير، وأهدافها، و قراراتها، ومكاسبها، وأوامرها خط أحمر.. لازم نحط خلافتنا فى التلاجة مؤقتا .. لازم ندخل القتلة كمان التلاجة .. مبارك ومبارك التانى جيم أوفر.
الإعدام لمبارك قرار الثورة .. القصاص للشهداء من 25 يناير لغاية النهاردة قرار الثورة .. مفيش مخلوق لسه فى مصر يقدر يغير قرار الثورة .
استعنا بالله القوى القهار .. ثم بجماهير الثورة الصامدة وندعو للآتى:
أولا: الاصطفاف الثورى لاستكمال ثورة 25 يناير .
ثانيا: دعوة جماهير الثورة؛ خاصة الطلبة، والعمال، والنقابيين، والنساء إلى استكمال انتفاضات الغضب حتى النصر.
ثالثا: موعدنا 27 /9 فى كل ميادين مصر تحت لافتة واحدة "الإعدام لمبارك .. القصاص للشهداء".
خلاص ياباشوات .. لموا الأوراق
جيم أوفر .. الثورة فى الميدان
إحنا المستقبل .. إحنا الشباب
الله أكبر .. وتحيا الثورة.
الموقعون :
حركة شباب ضد الانقلاب.
شباب الجبهة السلفية.
طلاب ضد الانقلاب.
طلاب الاستقلال.
مهنيون ضد الانقلاب.
حركة رفض غلاء الأسعار "صوت الغلابة".
التيار المدنى الثورى.
حملة المقاطعة مستمرة.
القاهرة فى 24 سبتمبر 2014.