الدولة اللتاتة

تعبان قوي ؟ ...مشغول بموضوع الأم المثالية الجايزة راحت لمين وعلى أي أساس ؟ في أمهات كتير أولى بالجائزة دي بيتعبوا وتعبانيين في تربية أولادهم وتعليمهم وعلاجهم ؟ ... متعودين ان هذه الجائزة لازم تكون من نصيب أم مكافحة ذات قصة مؤثرة من النادر إنك تصادفها أو تعرفها تكون لها قصة تدمي القلوب وتبكي العيون ؟؟؟ معلش وهي يعني جت على جائزة ؟؟؟ بالبلدي مهو يا تكبر مخك يا تفكر فيها بعقل وتروي ... وهو إيه في بلدك بيروح لمستحقيه ؟ ولا إيه في بلدنا موجود في مكانه( إلا ما ومن رحم ربي ) .. عندك معلم الأجيال إنتهازي بيهد الطفل بدل ما يبنيه ... الطبيب بيصيب المريض بمرض جديد بدل ما يداويه ... الصحفي بيغيب المجتمع بدل ما يوعيه ... ولا الشرطي وما أدراك ما الشرطي حامي الوطن كما يفترض فعنه حدث ولا حرج ... تزعل على حتة جائزة ؟؟!!!. في بلدي تجد قاتل شغلته وزير دفاع .. تجد مورد بذور مسرطنة للبلد وزير زراعة ... تجد وزارة تربية وتعليم مهمتها تصدير الجهل وتأسيس للضياع ... في بلدنا اللص رئيس جمهورية . لما تلاقي الشرطي بيتحرش بالبنات من سنين .. والجندي بينظم الطابور وبيقبض على طفل رافع أربع أصابع وممنوع من وقفته على الحدود ... تهتم بحتة جائزة ؟؟!!!
لما تلاقي إمام المسجد موظف بيتكلم في الصلاة والصيام تبعا للأوامر ... والي تفتكره عالم يطلع يكذب على الله تعالى ويفتي في الدين بما ليس فيه ... والي يقول على نفسه شيخ بيتلون بين يوم والتاني على حسب الصالح إيه . لما يتصدر للدعوة إلى الله شخص سريع الإستفزاز لدرجة إنه يتهاون في الكلام في الأعراض أو يوزع صور كان يعلم الناس أنها خليعه فقط ليثبت وجهة نظره ... وتجد من لا يفقه في الدين شيئا يتوعد بأن يعلمك الدين وأصوله ... تزعل على حتة جائزة ؟!!.
لما تلاقي من يعرف بإلتزامه يسخر من بنت إتعرت غصب عنها ويترك من عراها ... وتلاقي البلطجي أصبح ثائر والثائر بلطجي وإرهابي ... والمقتول قاتل والقاتل معذور ... وطالبة الأزهر تغتصب على مرأى ومسمع مجتمع لا يتحدث إلا عن الشرف في حين أن الراقصة بتروي قصص بطولاتها للجمهور على الفضائيات ... لما يكون بلاط الأرصفة في بلدنا أغلى من دم البشر ... والمواطن يموت تايه بردان في الجبل عشان مامعاهوش سائح أجنبي ... ولما إحنا نسيب كل المصائب دي ونفكر في جائزة إيه راحت لمين ؟ هل تزعل على حتة جائزة ؟!! ياسادة بعد كل البلاء الي في بلدنا والي هو في أصله كان ذنبنا وذنب الي قبلنا لو فضلت الأمور في نصابها لازم نخاف مهي بلاوينا دي تزلزل الجبال وتهد العروش فلا يعقل إنها تمر بدون عقاب جلل مثلها . وأخيرا لمن سيسأل كالعاده متهكما وهو ده وقته النقد والتجريح أرد طبعا وقته جدا والمعاد بالثانية ما احنا لو ما استفدناش من أخطاءنا وتفكرنا فيها في عز معاناتنا منها تفتكر ممكن نفتكرها بعد ما الغمة تزول وكل واحد يعيش في بلده منعم ومتهني ؟!!!
خليها عليك واترك ساعة من وقتك الي بتتحسر فيه على جائزة مش هتفيدك وإستغلها في التفكر في أخطاءك والتطهر منها للأبد يمكن نطلع بفائدة ...يا سادة إكتفينا زيادة من الدولة اللتاتة ومازلنا نحلم بشعب منتج ودولة متحضرة وحياة كريمة وبني ادم تحترم قيمته وحقوقه كاملة بدلا من أن تحتقر وتغتال وتقهر . يا سادة قد اّن الأوان أن لا نكتفي باللت والأحلام وتأخرنا عن المعاد فهبوا حياتكم تسلب وثورتكم تستغيث والحق يحتاج إلى من ينصره .
أمين إعلام حزب الإستقلال بالقليوبية