شروط دخول مطعم «مينا ويوستينا» في الفالنتين: الخصم للسناجل والدباديب ممنوعة

عيد الحب عند العاشقين هو فرصة مناسبة للتعبير عن مدى حب الطرفين لبعض كل بطريقته المختلفة، لكن مينا ويوستينا، كانا لهما رأى آخر، حيث قررا أن يحتفلا بالفالنتين مع «السناجل» على طريقتهم الخاصة. في شارع سوريا، بمحافظة الإسكندرية، وداخل أحد المطاعم الشهيرة في المنطقة، استعد كل من مينا مقار، 29 عاماً، وزوجته يوستينا، المالكين للمطعم تأهباً ليوم «الفالنتين»، حيث نشر مينا «بوست» على موقع التواصل الاجتماعى «فيسبوك»، على صفحة المطعم الرسمية، يعلن فيه تقديمه عرضا يوم 14 فبراير بتخفيض 10% على قيمة فاتورة الدفع «للسناجل» فقط، لأى من الجنسين، كما اشترط منع دخول الزبائن في هذا اليوم المطعم بالملابس ذات اللون الأحمر أو «دباديب». «مينا»، الذي تخرج في كلية فنون جميلة ويعمل في مجال الرسم والجرافيك، قرر أن يفتتح المطعم هذا العام، وتشاركه فيه زوجته، ويقومان بالطبخ فيه بأنفسهم. يقول: «أول فالنتين يعدى علينا بعد فتح المطعم، فقررنا أن يكون مختلفا، أنا عن نفسى مش بحب الأفورة اللى بتكون في اليوم ده، الحب موجود على طول مش بس يوم الفالنتين». يرى مينا أن الاحتفال ب«السناجل» في هذا اليوم ضرورى، لكن العديد من الأشخاص المتابعين لصفحة المطعم على «فيسبوك» كان لهم رأى آخر، ويقول «مينا»: «دى تعتبر هديتنا لغير المرتبطين عشان ميحسوش إن اليوم ده مش بتاعهم» ويقول: «فى ناس على السوشيال ميديا انتقدت الفكرة وناس قالت الشخص ده معقد وأكيد سنجل، لكن كان نفسى أقولهم أنا عايش فعلاً قصة حب جميلة». وتحكى يوستينا ميشيل، زوجة مينا، وشريكته في هواية الطبخ، أنها وافقت فوراً على فكرة زوجها، وتقول:«اللى عايز يحب حد يحبه أي يوم في السنة مش لازم يوم معين». حجوزات تتابعت على المطعم لهذا اليوم، وتقول يوستينا: «ناس كتير وهى بتحجز كانت مبسوطة بالفكرة وشايفة إن عكس الأماكن اللى بتحتفل بالكابلز وبتعملهم عروض اليوم ده، إحنا بنحتفل بالسناجل».