بالصور.. «الفالنتين» يسيطر على عقول رواد مواقع التواصل.. أبو علي: ربنا يديم الأونطة.. عثمان: الأهلي لسه خسران مفيش إحساس.. ديشا: خلصانة بدبدوب.. وأميرة تتقمص دور باسم مرسي

يحتفل الملايين في كل مكان في 14 فبراير من كل عام بعيد الحب "الفالنتين"، حيث يتبادل الأحبة الهدايا والورود، وقد حظيت تلك المناسبة باهتمام رواد مواقع التواصل الاجتماعي بشكل كبير، واختلفت وجهات نظرهم عن الاحتفال بها، ومن جانبها رصدت "فيتو" بعض التعليقات.
دبدوب بكرش
قال أبو علي ساخرًا: "هتعملي فيها بتحبيني هعمل بموت فيكي.. وربنا يديم بينا الأونطة"، وأضاف ميدو صاحب إحدى المكتبات: "المرتبطين يصرفوا كل اللي في جيبهم، وأنا أقف في المكتبة زي الباشا آخد منهم التحويشة وأدي لهم الهدايا وأضحك".
وقال اللول: "ده يوم الاكتئاب العالمي للسناجل"، وعبرت ريم محمد عن استيائها من عدم الشعور بمتعة الفالنتين قائلة: "أنا عمري ما عرفت اليوم ده ولا إحساس العشاق فيه بيكون إزاي ربنا يسعد قلوب الأحبة يارب"، وأضاف محمد علي ساخرًا: "واحد بكرش جايب لخطيبته دبدوب بكرش زيه علشان تفتكره بيه وهو مش موجود".
شوية فشار
وعلى غرار تصريحات باسم مرسي مهاجم الزمالك التي أثارت جدلا عبر مواقع التواصل الاجتماعي، والتي أكد فيها أنه غير متابع مباريات بطولة أمم أفريقيا بالجابون التي شارك بها المنتخب الوطني، قالت أميرة هانم: "لا والله مش متابع".
وفضلت مي محمود الجلوس في المنزل بدلا من التنزه في الفالنتين قائلة: "شوية فشار مع فيلم رعب وشيبسي وشوكولاتة وقاعدة كده في البيت برنسيسة بلا فالنتين بلا زفت"، وأشار إسلام الجندي إلى عدم إحساسه بهذه المناسبة قائلا: "حاجة نسمع عنها مش بنشوفها ولا بنعيشها".
ناس هايصة
وأضاف ديشا ساخرًا: "ناس هايصة وناس بتحقد على الناس الهايصة وناس تالتة بتحمد ربنا أنهم مش من الناس الهايصة عشان مش معاهم فلوس خلصانة بدبدوب".
وقال أدهم ساخرًا: "بتفرج على المرتبطين وهما بيحبوا في بعض"، فيما قال عثمان الناجي ساخرًا: "فالنتين إيه والأهلي لسه خسران مفيش أدنى إحساس بالمسئولية خالص".