النص الكامل لحوار السيسى مع رجال الاعمال المصريين

التقى الرئيس عبد الفتاح السيسى عقب إفطار أمس، الأربعاء، مجموعة من رجال الأعمال، على رأسهم المهندس نجيب ساويرس، ورجل الأعمال محمد الأمين، وأحمد أبو هشيمة، ومحمد فريد خميس، وصفوان ثابت، ومحمد أبو العينين، ومجموعة من رجال الأعمال وصل عددهم إلى 15 من كبار المستثمرين.
أمتد لقاء الرئيس برجال الأعمال لما يقارب الساعة، شرح خلالها الرئيس السيسي بعض أفكاره الاقتصادية، وطمأن رجال الأعمال على استثماراتهم.
ونشر العقيد عمر عفيفي عبر صفحته بموقع التواصل الاجتماعي «فيس بوك» نص الحوار الذي دار بين السيسي وعدد من رجال الأعمال المصريين.
وقال السيسي لرجال الأعمال: «أحنا جميعا الغني والفقير في مركب واحد ولا يمكن آحمل الفقراء وحدهم النهوض بمصر ولازم تساهموا معانا لآنقاذ الوضع الآقتصادي زي ما أتفقنا قبل الأنتخابات وطبعا كلكم رجال وطنيين ولازم تنقذوا الوضع معايا وطبعا حضراتكم عارفين أن دول الخليج وعدت بمساعدات ولحد دلوقتي منفذوش وعودهم لأن عليهم ضغوط من الغرب وشكلهم كده مش حيقدرو يساهموا معانا بشكل علني لأنهم وبمنتهي الصراحة تحت الحماية الأمريكية ولو خرجوا من طوعهم حيقلبوا الانظمة في الخليج كله يبقي مقدمناش حلول غير اننا نعتمد علي نففسنا وعلي سيادتكم لأن رفع الدعم حياخد وقت لحد منجمع الفلوس جنيه وتعريفة وبريزة من الناس، وأنا ضحيت بشعبيتي وده كان فيه مخاطرة كبيرة».
وأضاف «أنا عاوز من حضراتكم قرارات وأرقام عشان أعرف راسي من رجلي واحب اذكركم ومتعتبروهاش تهديد مني المركب بتغرق ومش حسيبها تغرق ولازم تعوم يعني لازم نعومها سوا ولولا رفعت الدعم عن الطاقة كنا حنعلن إفلاس مصر وفيه اتصالات بصندوق النقد الدولي والصندوق رحب برفع الدعم عن الطاقة والكهرباء بس انتو عارفين أن حباله طويلة وحينقطونا نقطة نقطة وطبعا ده ميقومش البلد».
وتابع «أنا عاوز أسمع من حضراتكم لآن القرار لابد أنه يكون بالتشاور بينا».
ورد رجل الأعمال أبو العنين على السيسي: «طبعاً يا ريس أحنا مش ممكن نتأخر عن سيادتك»، قبل أن يقاطعه الرئيس قائلاً «لا يا أخ محمد انا مبطلبش الفلوس لعبد الفتاح السيسي انا بطلب الفلوس لمصر يبقي الصح تقول أحنا مش حنتأخر عن مصر».
وأستطرد أبو العينين: «أكيد يا ريس احنا خدامين لمصر بس لا يكلف الله نفسا إلا وسعها وأحنا بقالنا 3 سنين في الجبس وحضرتك غليت الكهرباء والسولار ومعظم مصانعنا مش حتقدر تنافس بالشكل ده يعني مش حنعرف نبيع منتجاتنا - علاوة علي منعنا من المشاركة في الحياة السياسية بدعوي أننا من نظام مبارك طيب حط سيادتك مكنا - احنا دورنا ايه بالضبط في المرحلة القادمة ؟؟؟، هل أحنا مجرد ممولين وفي نفس الوقت ممنوعين من المشاركة في الحياة السياسية ؟؟؟؟».
وعاد السيسي للتحدث من جديد قائلاً: «يعني مطلوب المشاركة وأنا معنديش مانع بس لازم تبقي بالتدريج ولازم يحس الناس أنكم شيلتم البلد في محنتها ووقتها يبقي فيه قبول ليكم لكن فجأه كده حتفتحوا علينا أبواب كثير جدا».
وتدخل رجل الأعمال نجيب ساويرس في الحوار، قائلاً: «يا ريس أحنا في الآخر تجار وجمعنا فلوسنا بشقانا وتعبنا ومحدش فينا حيتأخر لكن لازم الأمور تبقي واضحة للكل ولازم الناس تعرف دورنا في انقاذ مصر لأنه مش معقول ندفع دم قلبنا ونفضل في عين الناس حراميه ومتهربين من الضرايب وسارقين الشعب».
وأوضح السيسي: «كل شيء حيكون معلن في كل وسائل الاعلام والناس كلها حتعرف مين اتبرع لمصر وبكام ووقتها الصورة حتتغير في عيون الفقراء - الناس مش عبيطة وهي اللي حتقيم».
وأشار ساويرس في حديث إلى السيسي، قائلاً: «يا ريس صدقني كلمة رجل أعمال بتساوي عند الناس حرامي لحد ما الواحد اتخنق - والسادة الاعلاميين شدين حيلهم علينا وطبعا حضرتك لازم تحترم ذكائنا شوية - الامور مبتجيش بالشكل ده واحنا ممكن ندفع لكن مش بأبتزاز الأعلاميين لينا وطبعا ده كله بتوجيه طبعا من جهات حضرتك عارفها واحنا عارفينها».
وتابع ساويرس: «حضرتك الاعلام بيكره الناس فينا وبيحرضهم علينا وده مش في الصالح العام لان ده حيكون نتايجة وخيمة وحيزود الاحقاد علي رجال الاعمال - حضرتك قولنا مطلوب من كل واحد مننا كام من الأخر».
وقال السيسي: «بلاش شغل التجار ده انا عارف انكم حتتبرعوا بأكثر من اللي ممكن أطلبه وعاوز اسمع من حضراتكم انتم آرقام لانها تبرعات اختيارية مش فردة عليكم وانا راجل بعرف ربنا ومش ممكن اخد فلوس حد غصب عنه».
ورد عليه ساويرس: «محدش حيدفع مليم غصب عنه ٫ لكن بالمحبة والتفاهم وحضرتك كل رجال الاعمال معندهمش حاليا غير حيطان المباني والشركات والمصانع ولو البلد عاوزاها احنا متنازلين عنها لكن يا تري هوه ده الحل ؟؟؟؟ ومين اللي حيدور الشركات والمصانع ؟؟؟؟ ومين اللي حيدفع المرتبات لملايين العمال اللي حيتشردو».
وأضاف «الموضوع اكبر من التبرع يا سيادة الرئيس واحنا كرجال اعمال الوحيدين القادرين علي تدوير العجلة ولازم يكون بالتراضي وكل الاطراف لازم يكون لها مكاسب ولازم اسلوب لي الدراع ينتهي تماما والاحكام التهديدية مش هيه اللي حتحل الموقف بالعكس».
وتحدث أبو العنين من جديد، طالباً من السيسي أخذ فرصة للاتفاق فيما بينهم قبل أن يردوا عليه، ليعلن السيسي موافقته، قائلاً «ممكن بس الاجتماع الجي يكون بارقام عشان اعرف راسي من رجلي».
وقال ساويرس للرئيس: «بس لينا طلب من سيادتك - وهوه لحد الموعد القادم لابد من ايقاف الاعلام لغة التحريض علي رجال الاعمال لان ده ابتزاز وتهديد ومش حيفيد بالعكس حيعقد الأمور».
ورد السيسي: «ماشي وابقي استني بعد الاجتماع عشان عاوزك - الاجتماع الجي خلال أسبوع ويارب اسمع من سيادتكم ارقام ومواعيد».