مدونة روح : بالفلاحي كده

قالوا (والعهده على كل من روى) إننا شعب عاطفى , انا عن نفسى بعترف (دا على اساس إنها جريمه) إنى عاطفى , الحكايه ومافيها ياساده ياكرام حكايه ريس, حكاية راجل قام من النوم ف يوم وبقى ريس , ومش هندخل فى موضوع الشك حواليه أنه متهم بقتل السادات أو حتى الإشتراك فى الجريمه أو العلم بيها أو التحريض عليها أو أى حاجه من دى , المهم إن الراجل قام من النوم ف يوم بقى ريس , زى بالظبط كلنا ماقمنا من النوم فى يوم وبقينا آباء, بقت فى مسئوليه فى رقابينا , بقينا متحملين أعباء, بقينا مربوطين بأولاد مسئولين مننا , وعلينا كل المسئوليات اللى تخصهم , الراجل برضه بقى مسئول عن بلد بكل مافيها , وبالطبع مفيش حد هيقدر يدير بلد لوحده (دا الأب فى ساعات كتير بيطلب المساعده فى طرق تربي' الولاد) , والراجل شال المسئوليه, وعاش بيها 30 سنه ,
يعنى إشتغل عندنا 30 سنه ,
وشال همنا 30 سنه,
ومشى أمورنا 30 سنه
طب مهو لو ناقشنا الحكايه بالفلاحى كده هنقولها إزاى؟؟؟؟؟
الراجل ده مسكلنا شغلنا 30 سنه وزرعلنا أرضنا 30 سنه , وسوقلنا المحصول , وجابلنا الفلوس بتاع المحصول ,......... وسرق شويه منهم ...... طب بعد 30 سنه هعمل معاه ايه
ياعم عشان خاطر العشره , وألأيام اللى قضيناها سوا , وخدمتك لينا 30 سنه ..............
روح الله يسهللك
طب بلاش فلاحى .... ناخدها إداري
موظف عندى بقاله أكتر من اربعين سنه (دا من أول الخدمه العسكريه يعنى ) والراجل ده فضل يترقى لغايه مامسك مدير عام , وخدمنا , وأدار ودور الشركه , وفى الآخر إكتشفنا أنه حرامى , طب هنعمل معاه ايه؟
أى مجلس إداره فى الدنيا هيعمل تقدير لفترة خدمة الراجل ده وهيقولوله : ياعم روح الله يسامحك باللى سرقته ومع السلامه !!!!!!!! طب احنا مش هنسيبله اللى سرقه .... هناخده منه صحيح مش هياخد مكافأه نهاية خدمه .... لكن مش هنحبسه .... هنعمل حساب العيش والملح ... هنعمل حساب الأيام اللى قضاها فى خدمتنا ... سهره الليالى عشان يعالج مشاكلنا ....
وبرضه هنقوله ............روح الله يسهلك
الراجل ده لو كان شغال فى قهوه 30 سنه
كان برضه صاحب القهوه هيقوله روح الله يسهلك
انا لا أؤيد مافعله الرجل ..... ولا أنكر أن له أخطاء .... ولا أنكر أن له من الأخطاء مالانعلمه...
ولا أنكر أننا لو سلمناه ليد العداله لوجدناه مدانا فى أمور عده
ولكن
العيش والملح له حق علينا