لمؤاخذة!

فلان: تقدر تقوللي تعريف محدد للشهيد؟
علان: بسيطة .. اللي يموت وهو يدافع عن بلده أو بيته أو شرفه أو أكل عيشه
فلان: واللي كان بيحرق قسم الشرطة عشان ينتقم من حبيب العادلي ورجاله وأمن الدولة؟
علان: لا .. أنت في الحالة دي تسألني الظابط والعسكري اللي ماتوا وهما بيدافعوا عن القسم شهداء ولا حاجه تانيه!
فلان: شهداء ونص
علان: يبقي اللي كان بيحرق يستاهل الحرق
فلان: لكن فيهم دلوقت اللي بياخد معاش شهيد.. وجنازته طلعت وهو ملفوف في علم مصر.. وأظن حصلت مع مساجين الفيوم اللي ماتوا وهما بيهربوا
علان: يا سيدي أرزاق
فلان: والشهيد اللي بحق وحقيقي يعمل ايه
علان: أجره عند ربه
فلان: وحقه عند الحكومة !
علان: حد من أهله يهربوا من سجن أو يشوفوا قسم بوليس يحرقوه أو يدوروا علي خناقة وحد يضربهم بمطواة أو يخبطهم موتوسيكل!