علي فكرة - يوميات نائم!!

حلمت حلما اللهم أجعله خير.. أني دخلت نادي الزمالك فلم أجد الأختين هناء وشيرين وغياب الخارجين علي القانون والمجرمين.. قال أيه في الانتخابات ملخومين.. وإعادة الحياة لوجوه الموظفين.. بعد صرف رواتبهم المتأخرة من سنين.. وعودة دروع الدوري للفتارين.. وكئووس من كل شكل ولون في كل الألعاب مرصوصين.. وسألت ايه السبب قالوا "عاد الضمير الغائب في البلد وسيادة القانون والدين".. ولاقيت الجناين خضرا والنجوم بتبرق في ليل النادي اللي كان حزين.. وفجأة عديت للبر الثاني ودخلت نادي البرين.. المعروف بالترسانة والدلع شواكيش ولاقيت أبوابه نظيفة من الزبالين.. لا بكلاوي ولا ناذلي ولا حتي الريس غرغرين.. ولاقيت حمام السباحة شغال بروحين.. روح المحبة وروح التمرين.. وقال ايه صعد الفريق من المظاليم وابتعد عن المنتفعين.. وجماهير لابسة لون المياه الزرقا بتعزف علي المندولين.. بتقول أيوه كده ياشواكيش العافية دقي رؤوس الظالمين.. وخرجت قولت أتفسح في الجبلاية بتاعة القرود.. شفت شمبانزي كبير ولئيم كان عضو بمجلس الحرامية.. بعد ما أصبح كبير المهلبتيه شلبايه وشوشو وأبو شوقيه.. مش ناوي يجيبها البر.. بعدما خلا الحكاية خل.. علي خرابها قاعد تحت حنفية الملايين.. رابض والحكاية معاه مش خلصانه البعيد أطرش مابيسمعش أنين أولاد البلد الموجوعين.. بيقولوا أه يانا من الفقر وغياب الملاليم.. قلت أعدي علي التليفزيون لاقيت عجازي المنتخب السابقين.. ما بيعرفوش من الفكة غير المليون.. وتسألهم عن البذنجان لا يفقهون.. غير الضرب في الميت وبنقدهم لاذعون.. عشان يعملوا لنفسهم سعر عشان الذبون.. عموما كلهم معروفون.. كومبارس وبقوا أبطال فيلم المذنبون.
وجالي شيء من الحقيقة فوز منتخبنا الاوليمبي وتأهله للأوليمبياد بهدفي جمعة وشرويده.. ونفسي يكملوا الحلم بميدالية اوليمبية بعد غياب 20 سنة كاملة بسبب الكواكب المستخبية.. عموما.. اكتفي اليوم.. وباقي الحلم هكمله لكم في المقال القادم.. قبل ما أصحي من النوم..