بالتحديد الأندية الشعبية.. والوطنية

* أول الكلام.. اللهم احفظ مصر واحفظ أمنها.. انت خير الحافظين.
* يا تري إيه آخر الصفقات في الأهلي والزمالك والإسماعيلي.. ويا تري فين المصري والاتحاد بمعني أصح.. الأندية الشعبية.. والا الاتحاد مش منها.
* يا كابتن زاهر إيه رأيك.. تسيب الهبوط.. ونسيب المادة ..18 خد يا سيدي الاقتراح ده.. يمكن ينفعك.. يتم صعود 6 أندية هي أول وثان بالإضافة لأفضل فريقين ثوالث الممتاز "ب" وإلغاء الهبوط وعمل دوري من مجموعتين 12 كل مجموعة مع هبوط 8 فرق للممتاز "ب" مع بداية تطبيق دوري المحترفين موسم 2012-2013 بس علي شرط مافيش فرقتين من المادة 18 مش كده ولا إيه.
* كل التحية والتقدير للواء محسن الفنجري واللواء طارق المهدي وكل أعضاء المجلس الأعلي للقوات المسلحة أعانكم الله علي أمن مصر والحفاظ علي مصر.
* يا شباب مصر.. رمضان علي الأبواب.. شهر الخير.. عايزين نرجع مصر لأيام الحب.. والتسامح.. وتنتشر موائد الرحمن في كل ربوع مصر الحلوة.. الجميلة.. الشعب الطيب.. اللي مافيش رمضان حقيقي إلا فيك يا مصر أم الدنيا.. وكل عام وأنتم بخير.
* اقترح علي لجنة الحكام انها تزكي عن أخطائها اللي أدت ل.. و.. و.. والحكم الهولندي ده منه لله.
* اقترح علي الأندية الشعبية تقدم طلب لاتحاد الكرة انها تشكل دورة فيما بينها يعلن الفائز بها بطلا للأندية الشعبية واقترح انها تضم أندية السكة الحديد والأوليمبي والمنصورة والترسانة ومنتخب السويس والشرقية وجمهورية شبين وطنطا وأسوان والمنيا والقناة وبلدية المحلة.. يا ريت تنفذه في رمضان علي غرار الدورات الرمضانية ونضيف لها الأندية الشعبية.. إيه رأيكم.
* ما حدث في مونديال السيدات يجعلني اتصور ان منتخب اليابان للجنس اللطيف يقدر يفوز علي كل فرق الدوري المصري واللي شاف كوبا أمريكا يعرف ان ميسي مش لاعب منتخب لكنه لاعب أندية من أجل ملايين الدولارات.. يعني غير وطني.. وكمان كل نجوم البرازيل والا تسموا اللي حصل في البطولة إيه.. يا عيني علي الوطنية.. علي فكرة فتشوا عن ميسي في منتخبنا ح تلاقوا كتير.. أقولهم.. والا انتوا عارفينهم.
آخر الكلام.. ان لم تستحي.. فافعل ما شئت.