ولسَّه العسكري لابيض بيقتل سود ..!!

يا "أمْريكا" ..
كفايه غباوه من فضلك
"أوباما" بينتهك عرضك
لا حريه ولا سياده ولا عداله
ولا حتي حقوق حيوان
وكل إداره من قبله
ومن بعده ..
بتتفنن في موت إنسان
و"فتنام" شاهده ع اللعبه
كما يشهد بها الأفغان
و"بغداد" لو تقول يبقي
كلامها دموع
و"سوريا" قلبها موجوع
و"ليبيا" اتقطَّعت تقاطيع
كمان "تونس" علي "لبنان"
وزحف جبان علي "الكويت"
وع "السعودية"
و"الخرطوم"
وع "البحرين"
وفوضي لكل شيء بتبيد ..!!
"يمن .. بلقيس" معدش سعيد
مفيش حته ..
في قلب العالم العربي
بدون أوجاع
بدون أطماع
بدون أحزان
جيوش المنطقه غابت
بفعل خسيس ..
هنا وهناك إيدين وسخه
بتقتل كل لحظه حسيس
وتدبح كل فرحه ف عين
يا شعب "أمريكا" ..
يا دايب في عز النوم
كفايه عليك خداع نفسك
وليه تمشي ورا "إبليس"
وناس أوغاد ..
و"فيتو" لسه بيضلل
وبيموِّت بلاد وعباد
"أمم متحدة" تاه فيها
الديمقراطي ..
و"مجلس أمن" بيطاطي
قراره بس ع المسكين
وع الغلبان ..
وع الواهن ..
وع اللي جداره في الواطي
وفين تبقي الشعوب الحره
في الدنيا .. ؟!
ما بتقومشي تثور ع الظلم
لو لحظه ..
شعوب مغلوبه من حبة
عيال حكومات
بتلعب بالبشر كوره
تسمِّن عجله ..
تعشقها وتدبحها
في أي زمان
وأي مكان
بلاد الدنيا في عيونها
"عجول ومعيز"
وغاويه تمشِّي عزالها
علي عكاكيز / تخاف الديب
عشان خاطر
عيون سوده ..
في "تل أبيب"
ويوتوبيا ولاد صهيون
بلاش يا شعب "أمْريكا"
تعيش مفتون ..
بحريه علي الأوراق
دا لسه العسكري لابيض
بيقتل سود ..
ولسه في السجون مظلوم
ولسه في الوجود إنسان