فكروها مر جيحايه راحه جايه ومصر شايله جرحها فوق الحوايه شايله أوغادها ولصوصها وطيبينها الخوف يدوسها وكل واحد قال بصوته فين عريسها وكل واحد له غوايه اللي عايزها غازيه واللي عايزها بملايه واللي حابس وشها تحت البراقع واللي لبِّسها العبايه واللي قال شعرها في الحسن آيه والجنايه اتشوهت كل الصبايا قالوا نبدأ من جديد ثوره بيضا والشباب أجمل نشيد شيلنا رايه وراها رايه والضلام يهرب وتنزاح البلايا رجعوها مرجيحايه رجعوها تشيل جراحها والحموله ع الحوايه اللي عايزها بحلق فالصو مصِّدي واللي قال الودي ودي تبقي ست الكل شايله أحلامها لبيوت العطشانين وبتمسِّي علي كل الزوايا واللي قال عربيه خالص واللي قال الوقت مايص واللي قال خليك معايا عندي خطه مرسومة ومحدد طريقها بالقانون الكل ياخد حصته وحقه محسوب بالجرايه واللي قال الغرب سِكه واللي قال الدنيا فكه سيبكوا منه دا أخ سَكَه واللي قال فين السلف كل شئ في الماضي حَلُه جثه والكل استحلوا والقلم مرعوش ومش شايف الدوايه وهيَّ لسه مرجيحايه راحه جايه اللي عايز صدرها يوريه لصاحبه واللي قال ولا شفت منها ... غير أذايا والغلابه لسه قاعدين ع الرحايه يطحنوا جوعهم وشايلين صبرهم والوجع بيجرهم إيه مصيرنا ؟ نشقي والأحلام لغيرنا قالوا في إيدينا البدايه بكره جايه الجنه والليل ينجلي والشجر يطرح عسل والحليب ها يصب طازه في القنايه وهيَّ لسه مرجيحايه راحه جايه ياللي قولتوا إنكم بالروح ولادها انجدوها من دقون الجهل وفلول الخبايا م اللي عرَّي جسمها تحت المطاوي واللي راهن دمها وعايز النهايه مصر فرسه مش ركوبه مش مطيه للمطايا مصر فوق الكل مش بتاعة حد ولا فرصه لعويل مصر هي العشق صَّباب للنهايه نيل أصيل ولا عمرها ها تكون هفيه ومرجيحايه راحه جايه . وفجأه هجمت الغربان علي تكعيبة العنب واتزحزحت بلاد واتشوهت عباد والجهل زاد والضلمه كاسيه من فاس إلي بغداد .. قُلنا نغني حُزننا طِلِع الغُنا متعاد والتيس بقرنه قلّع الأوتاد طِلع الجنين شايخ وطلعت علي الشاشه المشايخ بيقدموا الفتوي وف إيدهم المطوه والمجد للسطوه باسم الضلام يا كدَّابين في الصمت يا مُدلسين في الكلام مخنوق وفوقي جبل من الهبل والدجل والحزن والأوهام كوكتيل عجيب في زريبة الأغنام وربنا المعبود مصر اللي قاعده ع الرصيف مش لاقيه حق الرغيف راجعه بالمساكين وبالأيتام رافعين علي أرضها راية الحقيقه مبلوله بدموعها ومغرقه الأكمام ولا عمرها تنضام والكدب في الخرابات والمجد للأحلام البُق مش باين من الشَعْر اللي فوق الصدغ هايش .. عايز يرضعني حكمته الخايبه وفي إيده قايش .. عريان برغم كل الهدوم العيره .. بيروي للجُهَّال بواقي السيرة .. مساطيل بسحر الخرافه .. وخداهم الضلالات علي ابواب القرافه .. كنيف كبير وحكماه الكنافه . فينك يا صمويل بيكت ؟ اللحظه أكبر من خيال مرضان ها اكلمك عن دوده شايله الجبل وعن شجر بيجره ديل تعبان وعن ولد في الميدان بطنه مشقوقه بسيف الجهل والبهتان وعن صينيه فوقيها كوبيات الدم وعن تراب بتعبُده الخِرْفان فهمت يا صمويل ولا اتقهرت في مشهد العميان وخلطتْ حِبْرك بالدموع والِسم وصرخت لا للدم ياللي اشتريتو الكرسي بشوية زباله مش دي أصول النداله سألني صمويل وسابني هيَّ للنداله أصول ! حَطُّوا جينات التعاسه في القلوب السمحه والدم فوق السِبْحَه .. أشباح تحب الضلمه بِخْنَانها.. مهاويس وسحر الكرسي جَنْنَّها .. من بعد بَعْر الجمال داسوا بساتينها .. عايزين يشيلوا الراقات بس الراقات قادره .. عارفه أمون وآمين ومعات وحتشبسوت .. قالت : ها اواجه سحنة الجبروت مع الوشوش الفاجره . سامع جعير هو إحنا فين يا عم الحاج قال لي : في سوق الحمير نهيق .. نهيق والسبغه براني تبيع بكام وتشتري من مين مش دا السؤال يا فطين رايح لفين ؟ قال لي في زمن الخرابه خِرست المساكين والحمير متساقه ع القرون الوسطي كرباج ورا يا اسطي رايح أجيب خمسين جنيه م البوسطه عيالي جاعت وهمَّا بكل قِلة ذِمَّه بيخطبوا في الناس ويقولوا آخر آلسطه والحياه بِسْطَه وموت يا مصري في الشوارع والحارات موت تحت رجلين النجاسه بالجوع شويه وبالهزال والقهر بالكبد والسرطان وببياعين العُهر بضغط الدم والسكر بالحزن والجلطه وانت بتبيع ورد في الميادين القتل باسم الدين بسيف مسموم أو بالهموم أو بسن البلطه. "مقطع من قصيدة / ديوان بعنوان اكتبوا تحت الضلام بكره"
