بيحبوك

أوعاك تتخيل إن اللي باعوك
وخانوك
واللي انتهكوك
أو حتي اللي امتصوك ونفوك
كرهوك
أو م الأول رافضينك
مش شايفينك
أو عاللي في إيدك حاسدينك
أو حاربوك
أو طمسوا تاريخك وابتلعوك
قصدوا يضروك
بس يا مجنون
أنت اللي أكيد مش فاهم
دول أصحاب أفضال وجمايل
ياما امتدحوك
بيحبوك
كل اللي عليك
دوّر جواك
هاتلاقي أكيد العيب منك .. أو فيك
أنت اللي رضيت دور العرّاب العاقل
والساند كل خطوط الطول والعرض بقلبك وأيديك
يمكن ما أخدتش بالك إن الكوره الأرضية
مجرد كوره
تحتاج رجليك
وان اللي معاك في الملعب
مش هايسمّوا عليك
عايزين يوصلوا للمرمي قبليك
والشاطر هو اللي يسدّد
حتي ولو كانت أهداف من صنعك ومهارتك
وبلمساتك
وانت اللي رسمت التكتيك
كُن شيك
واوعاك تتصور
إن القطر الماشي بصفارة الناظر
قاصد يأذيك
أو يدهس عضمك ويعرّيك
أنت اللي اخترت ما تركبش القطر
وتمشي برجليك
الحق عليك
زيك زي حديد وشريط القطر المساكين
جبراً ماشيين
بس اطّمّن جدا وارتاح
أنا عارفك مش هاتسلّم
وتقضيها نواح
ولذا هاوصيك
لما هاييجي اليوم وهاتعرف أصحابك
م اللي خانوك
عايزك تتأكد جداً
قبل ما تحكم
مين من حواليك حبوك