سماوات

الرحيق بينام علي خد الزهور
والبنات الحور .
بتسبح في الندي
والندي مسرور
- وبيصاحب . شجر الطواويس .
... طالعه في الفجريه . تصدح
كل شيء كان نفسه .يفرح
جوهر العالم .....
بيسبح في عبيرمن برتقان
البلابل واقفه ع الغصن . بأمان
التعابين اختفت تحت الهجير.
الغيطان مليانه . نور
والسنابل حبلي ب بمحبه وعصير
والسحاب بيحب اسراب الطيور
الجنينه . بتشغي اشجار من نغم
والإيقاع تكعيبه من اعناب .
بتطفو ع الغدير
شجرة السيسبان .
بتنعس جنب زهره -علي الشطوط
اللمون في الضي مستسلم. ونايم
النسيم - عاقل . ساعات .
والتانيه طايش في الفضا .
يلاحق نسايم
القنايه . بتجري . تحضن في البيوت
حلوه ياريحة الغوايش
الخلاخيل . عماله تصدح . بالرنين
دافيه انفاس الخبيز
فايحه م المواجير في قلب الضي . تبرق
كل ما تجيبي في سيرتي
- في شطوط من بهجه .... - باغرق
كل ما تجيبي في سيرتي .
أغصاني بتشهق
في الشتا . باسخن - وباعرق
كل ما بالمح عيونك في المرايه
رسم صورتك . كل لحظه .
محفور في الخلايا ..
فيكي بانزل . تحت -
في حلم الكافور
جوه شهد من العسل .
في العيد - أزور
التقيكي في الطاقات المستحية زي نور .
زينة الكون والصبايا
انتشي كالحرف في لغة القرايه
انتي فرعيني . وشجرتي
انتي غنيوتي - وجارتي
ونني عيني وكل غايه
وكل حبايه .
بتطلع . في البكور في الربيع .
وبتطلعيني
انتي كل النور - ماليني زمليني .
زمليني زمليني
من الأسي . ومن الهجير .
ومن الضياع من ضباع - مرسومه ...
. بتبص بعيون مش وساع
وبنص عين
شفتك امبارح .
خيال من ضي في سيدنا الحسين
ماسكه فوانيس فزدقي
جوه أنوار . تغرقي
جنب حاره بتمرقي
جنب سوق - تتسوقي .....
اعناب . وتين
تسرحي في العطارين
عايقه . تحت الربع ماشيه
في محلات . القرنفل - والريحان
في محلات العطاره عند درب البهلوان
وسط العطوف
تايهه - في عالم حزين
بعد درب . النحاسين
الفوانيس . سهرانه تشكي
والدموع تملا . السواقي
والقنايات . والغدير
شفتك امبارح هناك .في كل درب
وكل . حي وكل بيت
في كل دير
الغصون - مليانه . انفاس من عبير-
لونك - الأبيض . تقي
شيخه في درب المكان .
في الحارات - -
وبتمرقي
م الإيشاربات في الموسكي .
دايبه في عطر المكان
م العطوف . للناصيه في قلب الميدان
لابسه ترتر -
شايله اقفاص من حنان
في غيطان من شوك .
في ضي . بتزعقي
جنب مني - في الحسين .
وبتمرقي
زي حفنه من الشعاع
فوق علالي المادنتين
الدراعات متشمره -
تبر. ولجين
بالفوانيس المضاءه
في ظلال . العطفتين
كنتي اختي - في الرضاع
جوه سطح .
وتحت قاع
حلو بيجيني الإيقاع
خالتي بتمد ف . ايديها .
تحضن النغم اللي ضاع
العرق . بيبل . روحي
بلي شربات . فوق سطوحي
واحمي قلبي من الشجن .
حطي منديل . فوق جبيني
دثريني . دثريني
في عبير . من ضي .
في الأرض ازرعيني
جنب عود صبار. في حوش
حوشي عني كل كوابيس الوحوش
زمليّني ... زمليني ..