آخر كلام..للسيسي وصباحي

دعا المرشح الرئاسي عبدالفتاح السيسي جموع المصريين إلي النزول للإدلاء بأصواتهم في انتخابات الرئاسة المقرر إجراؤها يومي 26 و27 مايو الحالي.
وقال السيسي- في كلمة وجهها الليلة الماضية إلي كل أبناء الشعب المصري- أدعو شعب مصر العظيم إلي المشاركة في التصويت علي الانتخابات الرئاسية والنزول بكثافة إلي صناديق الاقتراع. والتصويت للمرشح الذي يختارونه. ليؤكدوا للعالم أجمع عراقة التجربة الديمقراطية لدي المصريين الذين يسطرون صفحات جديدة في تاريخهم الحضاري الأصيل.
وفيما يلي نص الكلمة:
شعب مصر العظيم.. أيها الشعب الابي الكريم إسمحولي أن أتوجه اليكم جميعا بكل التحية والتقدير والاحترام. اسمحولي أن اتكلم معكم كمواطن مصري. وبغض النظر تماما عن أنني مرشح لانتخابات الرئاسة. مصر دلوقتي بتمر بلحظة فارقة في تاريخها ومصر كمان بتدعونا جميعا إن احنا نتحرك بكل قوة وبكل فاعلية وبكل تجرد عشان نحميها ونحمي مستقبلها.. الحقيقة: المصريين بالخارج قدموا مثلا رائعا جدا والدنيا كلها كانت بتتفرج عليهم وهم بيتحركوا في كل دولة تقريبا عشان يدلوا بأصواتهم في الانتخابات المظهر ده والشكل الرائع ده اعطي صورة قوية جدا في الخارج والداخل إن في ارادة للمصريين. وأن المصريين بيعبروا عن ارادتهم وبيتحركوا عشان ينفذوا هذه الارادة احنا اتكلمنا كتير خلال الفترة الماضية عن أهمية ان احنا ننهي خارطة الطريق بشكل هائل عشان نعطي رسالة قوية جدا للداخل والخارج.. نزول المصريين جميعا لكي يدلوا بأصواتهم في الانتخابات هتبقي رسالة قوية وتعبير حقيقي عن ارادة هذا الشعب الذي عندما يريد عمل شئ يعمله. ثورة واثنين أكدت قدرته علي ان هو بيعمل المستحيل. عشان كده اسمحولي ان أتوجه اليكم جميعا لكل المصريين.. يعني المرأة المصرية التي أكدت انها البنت الوطنية المصرية. اسمحيلي أن اطلب منك زوجة كنتي أو ابنة أو أخت أن تتحركي عشان تؤكدي ده مرة ثانية أمام صندوق الانتخابات.. كما الشباب. شباب مصر القوة. شباب مصر الامل القادر علي صناعة المستقبل. أنا بطلب منه ان ينزل ويدلي بصوته بغض النظر هو عايز يعطي صوته لمين. في النهاية أنا بكلم كل مصري ومصرية. هو فين. هو مين. هو ديانته ايه. توجهاته ايه. انتمائه ايه. مش مهم. المهم ان هناك حاجة تجمعتنا كلنا هي حبنا لبلدنا وخوفنا عليها واستعدادنا ان نضحي عشانها.. الوقت اللي احنا فيه ده هو وقت التحرك لكل المصريين. عندنا عدد ضخم جدا له حق الانتخاب فوق الخمسين مليون. كان في ناس بتكلمني وبتقولي ليه يعني في تحديات في الداخل والخارج وكنت برد عليهم واقولهم صندوق الانتخابات فيسئلوني دلالة ده ايه. الدلالة بتاعة صندوق الانتخابات ان هناك اجماعا وطنيا قويا وواسع جدا علي مستوي الجمهورية.. ده ينعكس علي قوة القادم سواء كان في التحرك بالداخل أو الخارج.. ارجوا ان تكون رسالتي البسيطة قد وصلت اليكم.. يعني من فضلكم كلكم دول يومين فقط بيترسم فيهما مستقبل مصر. والتاريخ بيكتب وبيسجل احنا بنعمل ايه لبلدنا. أنا متأكد أن أجهزة الدولة هتعمل بكل قوة عشان توفر الأمن والأمان.. الجيش والشرطة هتبذل كل الجهود.. أنا متأكد زي ما عملوا قبل كده وبيتهيألي أكتر. كما أنه خلال هذه المرحلة. أنا في الأخر بقول يارب ولي من يصلح شأن مصر.
يارب احفظ مصر. تحيا مصر.
والسلام عليكم ورحمة الله وبركاته.