الموت ميكسبش الرهان

يا اللا افردي قوس الجناح
وامشي علي الأوتار
وغني من جديد
غنوة ربيع
الموت ميكسبش الرهان
***
نصك فرح
والنص مشتاق للمطر
ح ارميله غيمة في بنطلون
عنقود ملاعبه
وح اعصره فوق الزبيب
وانا جاي
وماشي فوق إزاز العشق
وف دمي الحليب..
يمكن مناخي يكون قديم
لكني متأكد قوي
انه ح يمسخ
أي طقس يكون جديد
***
ياحبيبتي كنتي انتي
وكانت ميتك
وكتاب ليليت..
والحب شمعه منوره
علي مدخل القلب الحزين
وانا كنت ناعم
زي حلم يحققه..
وباصب في دورق ضلوعك
كاس..
وأقولك ده الكتاب
بالحب .. والقوة اكتبيه
وعنيكي كانت ليل
معلق فوق كتافه نجمتين
وعذاب حنين
كان السكوت
بيعري دم الشوق
ويكتب كلمتين..
كان نفسهم يتوصلوا في جملة
عشان جغرافية الوضع الجديد
تكمل ملامحها. وتلبس
توب حرير
***
وانا كنت طقس ميتنسيش
من غيره صوتك تل رمله
والطريق..
مرسومه من دم القصايد
والتاريخ ..
أشجار دموع..
***
السقا عدي
وللأسف مفهمتهوش
السقا عدي
بقربته وممسكتهوش
ساب لك يا دوب دورق
ميغسلش الهموم..
ودولاب همومك
لسه فيه فساتين كتير..
والتلج قاعد ف السما
مستني فرصة للهجوم
حتي اسألي الكنبة
وكرسي الأنتريه
ح يقولوا كان قاعد هنا
وضلوعه جسر من الحنين
ومعبي شوق كل السنين
هربان من الليل
والانين
كان ناوي يملالك
دوارق مهجتك
ويعلمك..
الحب مش طباشير علي السبورة
ممكن يتمسح
كان حبه لسه بيتولد
نازل ببرنس من دهب
شفاف
ورجليه مغسولين
ح يقولوا كان
ويا ريت يعود
علشان تقومي
وتفردي قوس الجناح
وتغني غنوه للمطر:
الموت ميكسبش الرهان.