غنوة عشان النيل

واخد من ابويا ..
اللون والطعم
وواخد من امى العصبية
و طيبة القلب و الريحة
و لون الشعر و التسريحة
و افكار ملعونة ..
مجنونة ..
صريحة ..
لا بخاف سلطان ..
ولا صاحب جاه
ولا بعبد قرش ..
ولا ماسك ف الدنيا ..
بضوافر
لكنى باعافر
باحلم و بسافر
باكتب على الورقة و اموت
بعشق ريحة الموت
ف سبيل الحق ..
هادى الطبع ..
باعرف امتى ..
بيعلى الصوت
عمرى ما اطاطى ..
و لا اساند خاطى
و لا اخد ظلم ف باطى
و هو ازاى الحق يطاطى ؟
انا كدا ..!
انا كدا ..!
حتى الولد الحيلة ..
واخد ريحة امى ..
و طبع العيلة
بس انا خايف لا عيونه الخضر ..
تسود ف يوم م الشيلة ..
اصل الورث تقيل
و الواد ضعفان ووحيد
شبهى ..
مشاكس قوى و عنيد
و دماغه حديد
بس قليبه حنيين
هو ( محمد ميدو حمادة )
ابنى البكرى
زيى بالتحديد
نفس النص و نفس كلامى
صورة طبق الاصل ..
زى احلامى
نفس الجسم و نفس الطول
نفس الحدة و نفس القول
عاشق وطنه
عاشق نيله
راضى بحكم الله ..
و عمره ما طاطى
و هو ازاى الحق يطاطى
هو انا خلفته عشان يطاطى
انا خلفته لجل ما يصبح درع ..
يحمى طفل و يحمى عجوز
انا خلفته لجل ما يصبح زرع ..
تلقاه بلادى يوم ما تعوز
درع و سيف ..
وغنوة عشان النيل ..
و وردة لكل شهيد
قلب امه .. عليه بيقيد
انا خلفته عشان يستشهد ..
فدا شبر .. ف ارض بلادى
و الشبر ف ارض بلادى
يستاهل الف شهيد
العاشق الجنوبى / منتصر سلطان
اسوان