رباعيات!

(1)
عملت لك من دموعي
بحر
زرعت شطه
شماسي
.. وخليت قلبي
مواني
وفى عينيكي
كل المراسي
ابتسم فى وجهك ألف ابتسامة وابتسامة
.. وانتى زى ما انتي
قلبك عليّ
قاسي

(2)
خاصمى زى ما انتي
عايزة
اخسرينى وحسي
إنك فى فراقي
فايزة
.. لكن لو حنيتى يوم لحضن عينيّ
ابقى هاتى معاكي
حروف الوصل
.. والهمزة

(3)
هددى بالرحيل
والبسى توب
حزن الولايا
.. وخلى شعرك الأسود
يهرب من ريح هوايا
.. اضحكى من ورا أو من جوه قلبك
بس إياكى تنسي
إنك كتبتى بحروف الفراق
إنك بكره
مش معايا