ارسميني

شعر

ارسميني
جوا قلبك
زى ضحكه
تكون ورود
زي نظره
ف كون شرود
تمسح الصمت
اللي عشعش
جوا أطياف القيود
ارسمينى
لمسه بتداوى الجراح
ارسمينى فوق جبينك
شمس بتشق البراح
اندهيلى أبقى فارس
صوته بيفك السراح
اكتبينى شِعر حُر
طارح محبه
فوق حيطانك
احفرينى نيل يمر
يزقى وردك
بين غيطانك
ارسمينى حلم
بينادى الشجر
غصن بيضلل عليكى
انقشينى بألف لون
فوق حجر
يبقى كحل رموش عنيكى
قيدى من خدك شموعى
امسحى بإيدك دموعى
لملمى بحضنك ضلوعى
عند موجك
مش هتلقى غير قلوعى
اندهيلى لو بعيدك
أبقى غنوه تكون نشيدك
ارسمينى
طير يغردّلك برئ
عاش يرفرف
فوق قصورك
فارس شجاع
مخلص جرئ
مات لأجل
تعيش عصورك
ارسمينى
زى ما قلبك يريد
دا أنتى قلبك لسه طاهر
دمى فاير فى الوريد
مهما يبهت يبقى ظاهر
ارسمينى
بدر بيلفلف فى كونك
نسمه بتغنى ف سكونك
عش مبنى من غصونك
عين بتحرسلك حصونك
روح شهيد ضحَّت تصونك
ارسمينى
نهر نيل شق الجفاف
حضن دافى للى خاف
اغزلينى
توب لبردك أو لحاف
بس نفسى مره أفهم
رغم خيرك
قاعده ليه اللقمه حاف؟!
ارسمينى عاشق مسافر
مكوى من شوق الحنين
سهم حبك فينا حافر
دا الهجر بيزيد الأنين
ارسمينى
فنان وريشه
كتاب وخط
الحروف بتبوس إيديه
أحلى عيشه
وبر آمن أعلى شط
مركبك ترسى عليه
ارسمينى
ارسمينى جوا قلبك
ضحكه بتداوى الجراح