حكاية الشيخ منصر (8).. "تجديد الخطاب الدينى"

تخرجت أول دفعة من معهد تدريب الحمير ،وأقامت إدارة المعهد حفلا كبيرا لتخريج الدفعة دعت إليه لفيف من النخبويين من صحفيين وإعلاميين وفنانين وغيرهم.تكونت الدفعة من خمسين دارسا، وكان ترتيب الشيخ منصرهو الأول على الدفعة حيث حصل على تقدير ممتاز مع مرتبة القرف، وقلّده مدير المعهد بردعة ثمينة مكافأة له.
وبعد انتهاء مراسم التخرج أُقيم حفل شاى وبرسيم ،وتبارت قنوات التليفزيون الفضائية فى التعاقد مع الخريجين ،وبالطبع كان للشيخ منصر نصيب الحمار حيث تعاقدت معه أكثر من قناة ، يتنقل فيما بينها متقمصا شخصيات مختلفة .
· هاهو الشيخ منصر يقدم أولى حلقاته على الهواء فى قناة التحميربرنامج جديد بعنوان (تجديد الخطاب الدينى).
قال : إن النّاس أسرى فقهاء القبور كأبى حنيفة والشافعى ومالك وابن حنبل ،وده كلام ما يمشّيش فى العصر الحديث لأن الدنيا تغيرت وأحوال النّاس تبدلت ولازم يبقى فيه فقه جديد من فقهاء معاصرين .
سيبكم بقى من واحد زى ابن حزم الظاهرى وخلّيكم –مثلا يعنى - فى ابن حزم الببلاوى. وعندكم كمان الفقيه أبو لهب وامرأته حمّالة الحطب .
ثم قال : حاضرب لكم مثل ..يعنى لو واحد صايم فى نهار رمضان وبعدين عاوز يعمل دماغ ،فيها أيه لمّا يقعد على القهوة ويشرب كرسى معسّل؟هوه يعنى كان كل ّ وللا شرب ،واللا كان كل ّ وللا شرب؟ مال الدخّان ومال الصيام؟
نيجى بقى للنقاب ...أيه حكاية النقاب دى؟؟فقهاء القبور منهم من أفتى بأنّه فرض ومنهم اللى قال |أ|نّه فضل ومش فرض. وإن الحجاب هوه اللى فرض.فضل أيه وفرض أيه اللى انت جىّ تقول عليه؟ الدكتورة (....) قالت ميت مرّة إن النقاب دِه فى شريعة اليهود ومش من الإسلام ، يبقى المنتقبة دى يا إمّا يهودية ، أو بتتشبه باليهود ،ومن تشبه بقوم فهو منهم ..يعنى تبقى يهودية برضه!
وبالنسبة لموضوع الحجاب فقد أفتى فقيه الزمان و العصر والأوان الإمام احمد ابن حمّالة إن مفيش حاجة فى الإسلام اسمها حجاب ....هوه ده الدين السمح الوسطى...لاحجاب ولا نقاب ..هوه ده التنوير والتجديد فى الخطاب الدينى اللى احنا عايزينه.سيبكم بقى م الكلام بتاع زمان دَه.
ثم قال : معانا اتصال تليفونى من الدكتور سمير ..اتفضل :
د.سمير : أنا عايش فى أمريكا بقالى 35 سنة باشتغل طبيب استشارى، ولى زملاء دكاتره فى المستشفى وهمّه يهود ،وسألتهم عن موضوع النقاب فى شريعتهم ،قالوا لى مفيش حاجة زىّ كده ،وفيه حاخام يهودى بيتعالج عندى وسألته نفس السؤال ، فاستنكر سؤالى وقال لى : انت عمرك شفت يهودية هنا أو فى إسرائيل لابسه النقاب ، قلت له لأ ..قال لى يبقى ماعندناش نقاب ولو كان النقاب فى شريعتنا لكانت السيدة جولدا مائير والسيدة تسيبى لفنى أول من يضعوا النقالب لأنهما من اليهود الأصوليين المتمسكين بالشريعة اليهودية .
الشيخ منصر :لكن اللى قالت كده فى مصر هى أستاذة فى الأزهر ،ومش معقول تكون يتجخ ّ أى كلام..
د.سمير : أنا قلت لك اللى عندى لأن انا كنت مهتم قوى بالموضوع ده لأن بناتى التلاتة مولودين فى أمريكا و منتقبات، ومع هذا لم يتعرض لهم أحد ومفيش مناقشات حول النقاب زى ماعندكوا فى مصر ، وعلى الدكتورة دى أن تبطل تقول هذا الكلام الذى لم تقدم أى دليل علمى على صحته وإنما هو رأي من عندياتها.وإذا كان اليهود قالوا إن الكلام ده غلط ولا أصل له فى شريعتهم ،فهل الدكتورة يهودية اكتر م اليهود ،حا تعرف فى الشريعة اليهودية اكتر م اليهود نفسهم؟
* معنا اتصال تانى م الفنّانة الكبيرة شوشو مونورو ..أهلا يا ست الكل ..منوّرة..اتفضّلى
شوشو مونورو : مساء الخير يا شيخ المنصر..أنا معجبة قوى بأفكارك وآراءك المودرن ، مبروك على البرنامج الجديد ..
الشيخ منصر : توشكرى على كل حال يا ست الكل ..

شوشو مونورو : الحقيقة إن دى مش أول مرة اشوفك ، أنا شفتك قريّب فى فيلم ( إضرب فى المليان ) وعجبتنى قوى لمّا قمت بدور الحمار ، وشفتك
وانت بتنهٌّق ولا العندليب، وبتتمخطر كده فى البردعة .
إنت أبدعت قوى وعشت فى الدور لدرجة انّك أقنعتنى وأقنعت الجمهور بإنك حمارحقيقي بجدّ..
الشيخ منصر : توشكرى على كل حال يا ست الكل..
شوشو مونورو :عشان كده أنا عايزاك معايا فى فيلمى الجديد اللى من انتاجى ..حاعمله عشان اعلّم الناس الدين الصحيح وحاقوم ببطولته.
الشيخ منصر : وأيه موضوع الفيلم دَه يا فنّانتنا الكبيرة ؟
شوشو مونورو : هوه فيلم إغراء.. أنا عايزة اقول للناس إن انا بوظف الجنس لخدمة الدراما عشان أعدل مخ النّاس المعقّدة اللى بتقول إن دى إفلام إباحية حرام يشوفوها
الشيخ منصر : تحت أمرك يا ست الكل ، دِه كلام حلو قوى ،لاحرام ولا حاجة مادام بتوظفى الدراما لخدمة الجنس ، ولو انّى مش فاهم الكلام ده معناته أيه ...ما نا حمار بقى ، وآديكي شايفة انّى من أول الحلقة عمّال اقول كلام حميرى زى ما صاحب الشفخانة اللى بيقبّضنى عايز!!
شوشو مونورو : يبقى اتفقنا ..وحا تاخد أجر كويّسٍ قوى زيّك زى بطل الفيلم و المخرج ،والبردعة علينا .
الشيخ منصر : وها يبقى دورى أيه فى الفيلم دِه بالظبط ؟
شوشو مونورو :أبدا..هوه هوه نفس الدور ..حمار .. مش انت قمت بدور الحمار فى فيلم ( إضرب فى المليان ) وبطل الفيلم ركِبك.. ؟
الشيخ منصر :آى نعم .....حُصل...
شوشو مونورو : خلاص ....يبقى معايا حاتقوم بدور الحمار وانا حاعتليك ..
الشيخ منصر :أيه اعتليك دى؟
شوشو مونورو : يعنى حاركبك ، زى ما كنت باعتلى الحصان قبل كده فى أفلامى ، لكن كان نفسى من زمان قوى أعتلى حمار ، وبصراحة ما لاقيتش أحمر منّك اعتليه.
*وهنا نهق الشيخ منصر نهقة حصاوى وأغمى عليه من فرط السعادة.