ننشر نص رسالة ضابط شرطه بالمنصورة لزملائه

"ياترى بكره هندفن مين ولا مين"

لم يتمالك ضابط نفسه من البكاء حينما سمع بخبر تفجير مديرية أمن المنصورة، فتوجه مسرعًا إلى المستشفى لمعرفة ما حدث لزملائه، فلم يتمالك نفسه ولم يجد شيئًا يفعل سوى بوست على حسابه الخاص على موقع التواصل الاجتماعي فيس بوك أبكى كل قارئيه.
رامي ياسين ضابط بمديرة أمن المنصورة قال:" أنا لسه داخل البيت حالاً راجع من مستشفى الطوارئ دخلت غسلت إيدى لقيت دم زمايلى نازل فى الحوض.. بصيت له وقولت يا ترى ده دم مين مجند ولا فرد ولا ضابط ولا مين.. أنا داخل المستشفى دموعى نازلة مش عارف ليه لحد ما عرفت خبر استشهاد العقيد سامح السعودي انهمرت فى البكاء.. مسكت نفسى بالعافية شايف ترولى شايل مجند رايح بيه يمين وترولى تانى شايل فرد رايح بيه شمال افتح ستاره الاقي ضابط غرقان فى دمه مش شايف بعينه ولا سامع بودنه سقعان مش لاقى حاجة تدفيه بيها قلعت البالطو وحطيته تحت دماغه.. وفاة مجند والتانى فى التالت فى الرابع الحق ده المقدم السيد رأفت استشهد فى عقلى شوفته بسرعة وانا بسلم عليه وهو بيقولى ايه يا ابو الروم نجم الشاشة إيه يا عم الكلام الجامد ده وهو "بيصقفلى" من شباك المديرية وانا معدى من تحتيها فى 30 يونيو وصوته وهو بيقولى ميه ميه ياد يا رامى بيعجبنى فيك قلبك الميت والله دكر ياد.. زكرياتى معاه عدت بسرعة قدام عينى والمرة دى مقدرتش امسك نفسى من البكاء.. شوية والحق ده العقيد سامح عبد الفتاح حالته خطيرة وجاى المستشفى فترة وكل شوية مجند يموت احزن على مين ولا مين سؤال وسألته للضباط زمايلى اللى كانوا معايا قولى يا عمرو هو احنا بكرة هندفن مين ولا مين وهنعزى فى مين ولا مين ... ومحدش لسة عارف الدور على مين .. حسبى هو الله ونعم الوكيل ... نحتسبهم عند الله شهداء".