باسم فى عش الدبابير

جهل ياعالم ولا دا إِسمه تخلف شعب
ولا نفاق ورياء مع كذب وخوف أو رعب
لما الساخر باسم يوسف يشتم مُرسى
وهو ساعتها أكبر راس فى الدولة وهو الكرسى
نقول حرية
ولما بيسخر م الإخوان ويقوم يوصفهم بالخرفان
نقول وطنية
لكن لما يكون فى كلامة تلميح ع السيسى
نقوم نوصفها بسرعه قلة تربية
وتقوم الدنيا وتوصف باسم إنه خسيس
لما يقول كام كلمة نقد على الببلاوى
تلقى الكل بيشتم باسم ويجهزله بسرعة بلاوى
واللى يقول باسم صرصار
واللى يقول باسم دا حمار
واللى يقول دا مش متربى
أمرى خلاص فوضته لربى
مش هو دا باسم اللى انتم ياما دافعتم عنه
ولا بسرعه قلبتوا عليه علشان واكمنه
قال حقيقتكم فى لحظة طيش
واتكلم حبه فى حق الجيش
يبقى جزاءه الموت والنفى
ويبقى مش من حقه يعيش