"المبخرة"

لفى وديرى المبخره
لفيها أيوا شمال يمين
شايفين فنون المسخره
وشهيدنا ماله يا ناس حزين؟!!!!!!!
يصرخ فى توب الكفن حلمى معاى اندفن
ليه البلاد ف العفن؟!
والسوس عاملها منخره
واحتاروا فيها المخلصين
لفى وديرى المبخره
راسنا قاعده ياناس تلف
والعقول خايفين تخف
نهر نيل إزاى يجف؟!
شوفوا الرشاوى والوسايط
والفساد دخانه شايط
والهموم طارحه سبايط
بلاك بلوك....و إيش تمرُّد
ماشين نعك ....وإيش تجرُّد
واحنا فى الوكسه تفرُّد
والوطن عايش تشرُّد
واحنا ف الزفه عبايط
والثوره راحت فشخره
لفى وديرى المبخره
لفيها النوبادى يمين شمال
لسه الهموم ع الكتاف أحمال
والحياه فوضى وسايبه
والقلوب ف همومها دايبه
العداله كلمه حلوه
بس جوّا بلادنا غايبه
ف الوطن أحلامنا خايبه
أزرع الورده ف بلادى
تطلع ريحتها يا ناس مجارى
بُصوا ع الوضع اللى جارى
..اف.....
إيه الريحه ال...!!!!!.
لفى وديرى المبخره
بخرينى وزغرتى
صَوَّتى
اتعفرتى
دا الخيبه خيبتى
قمت أيوا آه بثوره
قلت بكره أرد هيبتى
رحت راكب قطر حلمى
قالوا اصحى ياله فوق
ساعة بلدنا مأخره
هوا ذنبى ولا َّ عيبتى
إنى مصرى برئ بطيبتى
كنت فاكر بكره أحلى
دوَّخينا آه يا نحله
لسه قاعده العيشه ضحله
والرغيف بنشارته سحله
والعيون مش لاقيه كحله
كل مأزق ألف وحله
اللصوص طلعت براءه
وبجراءه
ادوهم وسام المفخره
لفى وديرى المبخره
نفس المصايب والمرار
نفس السيناريو والحوار
عاشق ترابك ومتحيَّر
ابنك أسير ومتسيَّر
إيه اللى فيكى اتغيَّر؟!!
صاحيين نايمين
سامعين شايفين
نفس الكابوس والمشخره
لفى وديرى المبخره
رشى دمعى ع الجدار
لفلفى على كل دار
اعملى حفله وزار
قولى حلمك كان هزار
أحسن يا ستى يحسدونا
احنا اللى تهنا ف المدار
والعباقره بيقودونا
عشنا نحلم بالنهار
عشنا نحلم بالشروق
نمحى ذل وكل عار
قلنا بكره أكيد نروق
والوطن يبقى اذدهار
نرتوى نبل العروق
تفضل الثوره انبهار
نزرعك ياسمين
وتين
ليه بنلقى الدنيا طين؟!
ف الهموم متبربطين
نفس الوشوش متلونين
من حزب لا وطنى وفساده
اللى خصخص
واللى مصمص
واللى قصقص ريش بلاده
واللى خلا كلاب ولاده
من قوت ولادى
متلذذين
بالقانون طلعوا الجناه
متعززين
والغراب خطف الدولار
كهربه وأزمة سولار
ف البنوك حاطين خزين
والوطن قلبه حزين
والشهيد ماخدش تار
إيش تمرُّد
إيش تجرُّد
واحنا ف الوكسه تفرُّد
والوطن عايش تشرُّد
الوطن قاعد بيصرخ
واللى سامع فينا مين؟!!!
الحكايه مش شعار
العداله هيَّه دين
تبقى ظلم يا ناس مبين
لو جات فى يوم متأخره
لفى وديرى المبخره
لسه الأمور متمسخره
لسه الأمور متمسخره
سوهاج - طهطا