دموع النيل

ابكى يا نيل
انزف دموعك حزينه
بجد
معانا مظلوم
غرقان ف الهموم
وإيدينا قصيره
مش قادره تتمد
محبوس بين ضفافك
والحزن شايله فوق كتافك
محروم من الفرحه
فى يوم زفافك
والحزن جواك استبد
ماشى ف سكوت
شاهد على ظلم البشر
والفساد اللى انتشر
والطفل البرئ
اللى بيموت
عبر التاريخ
مش ممكن فى يوم
تكبر تشيخ
رغم المحن
وقسوة زمن
نبضك دا صوت
يخلِّى العزيمه تتشد
بتروى الأمل فينا
مهما عانينا
بترسم ضحكة فى عنينا
وتبل ريق الحجر
وضلك علينا
بيطرح شجر
كله فروع
ما يعرف قيود ولا حد
دمك
دموعك
ميَّه بتسيل
بنرمى فيك جثه وقتيل
حتى الزباله وحتى الغسيل
تلويث مجارى ليل نهار
إسراف وإهدار
وبتنده تنادى
مش لاقى رد
نعمة كبيرة للوجود
لو تغيب
نتمنى يوم ترجع تعود
ونبكى دموع ع الخد
دا انت حاضرنا
وماضينا
وانت بكره كمان وغد
فيك سر الحياه الكامن
وانت لينا الحضن الآمن
خيرك علينا عمره ما يتعد
عايزين يحرموك
من شعوبك
عايزين يكتبوا
صفحة غروبك
ويرفعوا
بينا ما بينك ألف سد
مكر وخداع وغدر بيفوح
وخطة لئيمة فيها جروح
وحلمهم كداب
نهايته سراب
ولازم فى يوم يتهد