آآآه...إن شاء الله!!!!!!

صليت الجمعة في مسجد المصطفى أيام كنت إمامه منذ أربع سنوات
وكانت خطبتي ملتهبة وتناولت فيها شيئاً من أوضاع الناس ومشكلاتهم وعاداتهم..
وبعد الصلاة خرجت قافلاً إلى بيتي فصحبني شابٌ في مثل سني تقريباً تبدو عليه أمارات الاحترام والرقيِّ الخلقيِّ والأدب وأنه ابن أصول وابن ناس طيبين ومش وش بهدلة..
كلمني بخجل وحياء وحرج شديد...
يا شيخ أنا عندي مشكلة...
خير إن شاء الله كفى الله الشرَّ!!
أنا متزوج من امرأة من عائلة غنية وأسرة قوية لكنهم ليسوا على دين وليسوا على خلق...
طيب إزاي يعني انت مكنتش عارف؟
بص يا شيخ
أنا أصلاً خريج تجارة وأهلي ناس على قدهم مستورين لا أغنيا ولا فقرا
والدي ساعدني في الشقة بجزء من المكافأة بتاعة الشغل على قد قدرته وطاقته وطبعاً مينفعش يزود لأن عندي أخ لسه بيتعلم وعنده مصاريف وبرده لازم يتجوز هو كمان...
اشتغلت في محل ملابس جاهزة في وسط البلد وربنا أكرمني لما صاحب المحلات شاف أمانتي وشغلي خلاني المدير المالي على كل المحلات دي وعرفني على أسرته واتجوزت بنته...
كنت فاكر أنها على خلق ودين لمجرد أنها لابسة نقاب...
لكن يا شيخ الصراحة من بعد الزواج وكمان وفاة والدها اللي هو مكنش ليه أي كلمة في الزواج ولا في البيت خالص
إنما كانت الاتفاقات كلها مع الأم اللي هيا حماتي..
أنا قلت: مش مهم اللي يهمني البنت وطالما هي لابسة نقاب يبقى متدينة وعارفة ربنا وهتعرف حق الزوج وكده يعني..
اكتشفت يا شيخ أن الكلمة كلمة الأم حتى ع بنتها ومش بس البنت ده كمان على الذكور اللي هما متزوجين ومستقلين في حياتهم..
أنا بقالي تلات شهور يا شيخ بنتي مع مراتي عند أمها ومش عايزين يخلوني أشوفها ولا راضية ترجع وأمها مكبرة الموضوع ومنشفة دماغ البنت...
طيب يعني محاولتش تدخل حد في النص بينكم يصلح ويهدي ويرجع الأمور للخير..؟
يا شيخ مفيش حد ليه كلمة ع الأم...
تعرف يا شيخ؟
مرة بس على سبيل المثال..
مرة كنا متفقين بالليل أنها هتطبخ ملوخية
رجعت من الشغل تاني يوم لقيتها طبخت بامية...!
عادي يا أستاذ ممكن القرار يتغير في أي لحظة لأي سبب!!
يا شيخ مع احترامي لحضرتك
السبب أن أمها كلمتها الصبح وأنا في الشغل قالت لها هتتغدوا إيه النهارده قالت لها ملوخية
قالت لها: ملوخية إيه بلا ملوخية اطبخي بامية...@@
وطبعاً سمعت كلام أمها وطبخت بامية...
يا شيخ أنا مش مهم ملوخية ولا بامية ولا حتى جبنة نستون
المشكلة أنها مش عاملة لي أي احترام ولا اعتبار...
ده ناقص لو حبيت يعني لا مؤاخذة ...فاهم يا شيخ؟
لو أمها قالت لها لا
تقول لي لأ!!
قلت: طيب مفيش شيخ بتحترمه وبتسمع له وتسأله في الدين وبتاخد برايه؟
معندكش قنوات الناس والرحمة والقنوات الدينية دي؟
يا شييييييييييييييييييييييييييييييييخ دي هيا وأمها طول النهار والليل معندهمش إلا القنوات الدينية....!!
لكن يا شيخ من غير فايدة!!
ازاي يعني!!؟
أقول لحضرتك:
مرة كان الشيخ مش عارف بالظبط مين لكن كان بيقول:
لو زوجك قال لك متروحيش عند أمك يبقى تسمعي الكلام ومتروحيش عند أمك لأن طاعة الزوج واجبة والإثم عليه!!!!
تعرف يا شيخ عملت إيه؟
إيه!!!؟؟؟
صرخت زي مشجعين الكورة وشوحت بإيديها الاتنين على الآخر وقالت:
آآآآآآه إن شاء الله!!!
أعمل إيه يا شيخ؟؟؟
وهنا جاءني اتصال هاتفي فاستأذن وانصرف على أمل اللقاء ولم يتم لقاء جديد....
ابن الأزهر ومحبه*
الشيخ الشاعر
كارم السيد حامد السروي
إمام وخطيب بوزراة الأوقاف المصرية
ABOASMAA20011@YAHOO.COM
أرسل مقالك للنشر هنا وتجنب ما يجرح المشاعر والمقدسات والآداب العامة
page2almesryoon@yahoo.com