قالت زوجتى: يسقط النظام..!!

مع مطلع كل صباح.. يستقبلك كل من تلتقى بهم داخل دائرة اهتماماتك اليومية.. بأسئلة وحوارات كثيرة ومتنوعة فى البيت أو فى العمل أو فى الشارع.. أمام المخبز أو مع السائق أو عند الحلاق.. والكل يدلو بدلوه بِعلم أو بغير عِلم.. مؤيداً أو معارضاً.. يأساً أو متفائلاً.. بحق أو بغير حق..
- إيه الأخبار؟
-أخبار منيلة بستين نيلة!!!
- يا ساتر يارب.. صباحك فُل.
- منين طيب؟ هل سمعت ما قاله فلان على قناة سى بى سي؟
- نعم.. بس على فكرة بعدها بشوية غير كلامه على قناة أون تى في.
- معقول؟
- يا عم رَيح دماغك؟ كله أكل عيش!! وكله حسب طلب الزبون.. دى وجوه كالحة.. بلاستك يعني!!
- طب إيه رأيك فى خطاب الريس؟
- خطاب إيه ياعم.. دا كله كلام إنشا.. شفت شفيق، والواد أبو حامد وباسم يوسف بيقولوا عليه إيه؟!
- شفت البرادعى بيطالب بإيه؟
- عايزنا نعترف بالهولوكوست ونبنى معابد للبوذيين.
- هو احنا عندنا بوذيين؟
- بصراحة دا راجل نايم فى العسل.. خليه جالس على تويتر.
- سمعت حمدين صباحى أمس فى المؤتمر الصحفي؟
- بيقول الرئيس فاشل وجماعته.. ولن نسمح للإخوان بسرقة ثورتنا.. ليه هى الثورة بتاعته؟
- دا عادى جداً من حمدين.. أيام المخلوع كان متحالفاً مع الإخوان وبينجح فى البرلمان بأصواتهم.. سبحان مُغير الأحوال.
- لا.. بلاش الكلام ده.. حمدين ناصرى بيدافع عن حقوق الغلابة والفلاحين.. دا واحد مننا.
- يا عم روح بلاش كلام فاضي.. غلابة مين.. دا واحد خمنا!! هما لو كانوا بيدافعوا عن الغلابة كان ذهب وفد منهم لتأييد بشار سفاح سوريا!
- سمعت عن جبهة الإنقاذ؟
- إنقاذ إيه؟
- إنقاذ الوطن.
- من إيه؟
- من مرسى وجماعته.. فيها البرادعى حبيب البوذيين، وحمدين صباحي، والمضروب على قفاه السيد البدوى زعيم الوفد، وعمرو موسى زعيم المؤتمر، وأبو شعر منكوش حمزاوي، وحزب ساويرس، وأبو الغار، وأبو الفار، وأبو الوفا، وأبو رجل مسلوخة، والأبلة تهاني، وسامح عاشور، وسعيد وسعيدة.
- عجيب!!!
- علماني، وليبرالي، ورأس مالي، وناصري، وشيوعي، واشتراكي، وثوار، وفلول، وأخيراً بلاك بلوك!
- يعنى سمك لبن تمرهندي.. إنها حقاً عائلة محترمة.
- وإيه جمع الشامى مع المغربي!!
- بصراحة عايز الحق ولا ابن عمه؟..
- طبعاً عايز الحق.
- شوف يا عم.. شلة الإنقاذ دى عايشة على فَضلِة خير مرسى وحكومته.. الإنقاذ لم يصنعوا أى حدث.. ولكن المطبات والأخطاء التى وقع فيها مرسى وحكومته هى الزاد اليومى لهم.. وهم أساتذة فى تصيد هذه الأخطاء وبالتعاون مع شلة الأنس بتاعتهم فى الفضائيات بيحولوها إلى مندبة وجنازة حارة آناء الليل وأطراف النهار.. ببساطة بيعملوا من الحبة أوبة.. والشعب فاهم إن الشلة دى معندهاش مشروع لإنقاذ الوطن ولا يحزنون.. خاصة بعد استعانتهم بالبلطجية والفلول للتظاهر وقطع الطرق والهجوم على المترو وتعطيل مصالح الناس ومحاولة اقتحام قصر الريس بالطوب والمولوتوف.
- رغم ذلك الريس بيدعوهم للحوار وهما بيرفضوا.
- بأه الجبهة تجلس وتتحاور مع “مكين الصهيونى الأمريكي” وترفض تتحاور مع الريس.. دى جبهة إغراق مش إنقاذ.. دا مش عاجبها العجب!!
- بصراحة إحنا محتاجين نعمل جبهة لإنقاذ الوطن منهم.
- طيب إنت مقتنع بجدوى الحوار الوطني؟ الناس تتفق مع الريس.. وبعدين يخرج غزلان الإخوانى يقول الحوار غير ملزم وبتوع الحوار الوطنى مش بيمثلوا الشعب؟؟ معنى ذلك إن الكلمة مش كلمة الريس.. دا كلمة المرشد.. أهو الكنيسة انسحبت من الحوار الوطني!
- بصراحة يسقط يسقط حكم المرشد!!
- مين المسئول عن قتلى الاتحادية وبورسعيد والسويس؟ وحالات التحرش والاغتصاب فى التحرير؟
- بمناسبة التحرش.. أظرف شيء إن الأبلة تهانى وأبو الغار وشلة الإنقاذ عملوا مظاهرة بيقولوا فيها إن الإخوان لديهم ميلشيات للتحرش بالنساء.. والأظرف منها إن العصابة بتاعة البلاك بلوك رغم إنها اعترفت بحرق مقرات الإخوان فى 26 محافظة فى وقت واحد.. تقوم تطلع شلة الإنقاذ وتقول إن مليشيات الإخوان هى اللى حرقتها.
- بالله عليك دا كلام ناس عاقلين ومتعلمين وبيفهموا سياسة.. وناس بتوع قانون.. وواحدة منهم كانت عضو فى الدستورية.. بصراحة دى كذبة إبريل!! بس جت بدرى شوية.. وإيه حكاية العيال بتوع البلاك بلوك؟ يعنى الداخلية والمخابرات مش عارفين مين بيمولهم وواقف وراهم؟ دا كل شيء أصبح عينى عينك!!
- يا عم إذا كان الريس مش عارف يحمى القصر بتاعه؟ طب الناس تعمل إيه؟
- بصراحة مرسى ضعيف.. وحكومة هشام قنديل أى كلام!!! فين العدالة الاجتماعية.. وإيه حكاية 3 أرغفة لكل مواطن؟ هى دى الثورة؟ هو دا مشروع النهضة؟
- هل سيقدم الإخوان نموذجًا للحكم الرشيد؟
- سيبك من الفصحى بتاعتك دى والفذلكة فى الكلام.
- رشيد إيه يا عم.. إنت نايم؟ دا كل حاجة وعدونا بيها تراجعوا عنها.. فاكر وعود مرسى قبل الانتخابات وحكاية ال100 يوم؟.. فاكر مؤتمر ”فرمونت”؟.. كل من عصر لمونه ودعم مرسى والإخوان فى جولة الإعادة أمام شفيق أصبحوا ندمانين.
- بص بأه أنا هاجيبها ليك على بلاطة.. الإخوان مالهومشى عزيز.. يعنى من الآخر بتوع مصلحة.. هما عايزين يأخونوا الدولة وبس، دا عاوزين ياخدوا كل حاجة.. بس مصر كبيرة عليهم.. دى القاهرة.
ورغم حرارة النقاش وكثرة المداخلات وحماسة وتنوع المشاركين واختلاف مستوياتهم التعلمية والاجتماعية، إلا أن الأمر الجدير بالملاحظة أن نسبة كبيرة من المتحاورين قد نجحت الفضائيات وبهلواناتها فى تحويلهم إلى ببغاوات عقلها فى أذنيها! تردد ما تسمع دون أن تعقل ما تقول!! ومن ثم غالباً ما ينتهى الحوار والنقاش والجدال بالتى هى أخشن.. الأمر الذى يُزيدك يأساً وإحباطاً وغماً على غم، متسائلاً: هو فيه إيه؟.. هى مصر رايحة على فين؟
بيد أنى سرعان ما أعود لطبيعتى متفائلاً.. قائلاً: ثورتنا حدثت على غير مثال سبق، وجاءنا مرسى رئيساً من حيث لا نحتسب، وإن شاء الله ستكون عاقبة ثورتنا إلى خير.
مُسرعاً الخُطى أعود إلى بيتي.. تستقبلنى زوجتى قائلة
- أبا محمد.. رأيت ليلة أمس فى منامي.
- قلت لها: خيراً إن شاء الله.
- قالت رأيت طرابيزة عليها رموز أشياء كثيرة، ومن حولها الناس تهتف: يسقط النظام، فتسقط بعض الرموز، وكلما هتف الناس يسقط النظام، تسقط رموز أخرى غريبة، حتى سقط كل شيء، وبقى على الطرابيزة مصحف وسبحة.
فقلت: إذا كان الباقى هو المصحف والسبحة.. إذاً يسقط النظام.. يسقط النظام..
يقول رب العزة سبحانه وتعالى: "فَأَمَّا الزَّبَدُ فَيَذْهَبُ جُفَاءً وَأَمَّا مَا يَنْفَعُ النَّاسَ فَيَمْكُثُ فِى الْأَرْضِ".
حفظ الله مصر وأهلها
esamabdelaziz@gmail.com