القانون المطاطى

أنا مؤمن برب الكون
ومش كافر
لكن أنا نافر
بقولها بكل جراءة
من غير خوف
نافر
لقانون الظلم
المتنافر
اللى بيدى المجرم فرصة
يحرق بلدى
ويقتل ولدى
ويسرق حلمى كمان ويسافر
أنا باعلن رافع صوتى
كاره نافر
لقانونكوا الوضعى المتنافر
بقولها بكل جراءه
إمتى المجرم يبقى براءه؟!
ويغيظ فينا ويركب خيل
ويغنى يا ليل
هتشوفوا الويل
دا حصانى بديل
بيدوس بحوافر
كاره نافر
لقانون مطاطى
خلا الحق يتوه ويطاطى
خلا الباطل يكبر
جوا حيطان الضلمة
ينهش قوت الشعب الطيب
ويشيِّب
قلب رضعيى
بكل نياب القسوة
خلا ذئاب الشر
تربِّى ضوافر
ليه العدل يا ناس بيغيب؟!
مجرم يهرب بالألاعيب
ألفين ثغرة معاة ودليل
خلا المجنى عليه دا ذليل
اصل اللعب معاه متوافر
ليه الظلم ف قلب بلادى
لسه معشعش؟!
لابس ألف قناع ع الوش
بيهش ينش ؟!
وبانى قصوره
ف أزهى عصوره
ساكن كل أماكن
رامى جذوره
جوا غيطان بلادى
وحافر
ليه الحق بيصرخ
يبكى ويشكى
وصوته لسه ضعيف بيعافر
أنا بأعلن إنى أنا نافر
لقانونكوا المطاطى المتنافر
الشاعر / راضى على الطهطاوى
سوهاج - طهطا - عرب بخواج