خبر سار من «مي حلمي » لجمهورها

أعربت الإعلامية «مي حلمي»، عن غضبها من مروجي الشائعات التي تتعلق بأزمة إلغاء حفل زفافها إلى الفنان محمد رشاد، بتوجيه رسالة لمحبيها قائلة قريبا نخرج ونعلن تفاصيل ما حدث وفرحتنا ستعود مرة ثانية.
وأضافت «حلمي »عبر حسابها الشخصي علي موقع التواصل الأجتماعي «فيس بوك» "مش عايزه اتكلم في اي حاجه غير عن وجع كسره الفرحه، ولا اعلام ولا ميديا ولا دنيا ولا مين شمتان ولا مين فرحان مش فارقلي.. كلنا بندور علي الفرقعة علي السبق الي يضرب بس لو هتكلم عن نفسي عمري ما هعمل كده وقت غياب فرحه حد ومش أي فرحة دي فرحة العمر زي ما بيقولوا.. ازاي؟ أزاي قدرتوا تعملوا كده لكل الناس وأولهم القريبين إزاي قدرتوا تقولوا كلام غلط وحكايات ماحصلتش أزاي سبتوا فرحتنا علي جمب طيب هقولكم".
واستطردت: "عارفين يعني إيه بعد ما ألبس فستاني أقلعوا؟ بعد ما خلاص خطوة واحدة من 4 سنين مستنياه تبوظ بسبب الناس اني نقلت كلام غلط مش هقول الميديا الميديا طول عمرها كده وقبل ماشتغلها وأنا عارفه أنها كده نتكلم عن الناس الطبيعية.. أزاي قدرتوا تشمتو وتفرحوا في وجع غيركم واللي يدعي واللي يضحك والي يقول أحسن فهموني انتو بني آدمين؟.. بتخافوا ربنا".
وأضافت مي: "طيب حتي لو نفرض وده فرضًا أن حد من الطرفين غلطان ليه الدعاء عليه والحسبنة ليه أصله مش زرار هتقوم من النوم تدوس عليه فهتنسي العشرة والسنين وتقعد تدعي وتهين لا لا أبدًا مهما حصل بتلاقي نفسك مش طايق كلمة وحشة علي الطرف التاني ونفس الكلام للطرف الآخر".
وتابعت: "بعد الهيصة والزيطة ما بيفضلش غير الحلو وبيبان الوحش بس كل اللي عايزه أقولوا الشدة بتبين .. في الآخر حبيت أخرج كلام جوايا من اللي شوفته اليومين اللي فاتو و والله والله مافرق معايا غير فرحتنا انا وهو مش انا بس الي اتكسرت فستاني الي قلعته بدلته اللي اتقلعت ومحدش فاهم حاجة اهالينا اللي زعلانين علينا".
وواصلت: "ماكنتش ناويه اتكلم بس كلام جوايا وكنت عاوزه اقولو محدش بيرضي في عشرة عمره لو عامل فيه ايه مابيرضالوش الوحش ولا دعوة واحدة بالغلط عشان ماحدش كان عارف ايه الي حصل معظم الناس انا كنت هناك انا كنت حاضر انا كنت شاهد ... كنت دعيت ربنا يهدي الدنيا ويجمعهم في الحلال بدل ما كنت حكيت الي سمعته مش الي شوفته احساس صعب فرحه عمرك تتكسر قدامك بعد سنين مستنيها ساعتها ولا بيفرق شكل من كلام ناس من دنيا".
واختتمت مي حديثها: "فرحة فستان بتاعة الراديو راجعه راجعه إن شاء الله هنحكي كل حاجه وهنقول كل حاجة بس في الوقت اللي احنا عايزينه مش الي الناس عاوزاه.. نصيحة من قلبي لكل اتنين متجوزين عايزين يسيبو بعض لكل اتنين مخطوبين لكل اتنين بيحبو بعض "الحب ما بيتبعش" ولو ضيعتوه والله ما بيجي تاني امسكو فيه مهما حصل اكيد هنطلع ونتكلم بس ادونا شويه فرصتنا مع بعض بعيد عن الأضواء وعاوزه دعوة حلوة لينا أرجوكم".