مي حلمي تبعث رسالة شديدة اللهجة للشامتين: "إنتوا بني أدمين؟"

علقت المذيعة مي حلمي، عبر صفحتها الرسمية بموقع إنستجرام، على الأقاويل المنتشرة عقب إلغاء عقد قرانها على الفنان محمد رشاد، قبل حفل الزفاف بساعات قليلة، والاتهامات الموجهة لها بأنها المتسببة في إلغاء الحفل.
وقالت "مي": "مش عايزة أتكلم في أي حاجة غير عن وجع كسرة الفرحة، ولا إعلام ولا ميديا ولا دنيا ولا مين شمتان ولا مين فرحان مش فارقلي، كلنا بندور على الفرقعة على السبق اللي يضرب".
وتابعت: "لو هتكلم عن نفسي عمري ما هعمل كدة وقت غياب فرحة حد، ومش أي فرحة دي فرحة العمر زي ما بيقولوا، إزاي قدرتوا تعملوا كده لكل الناس وأولهم القريبين، إزاي قدرتوا تقولوا كلام غلط وحكايات ماحصلتش إزاي سبتوا فرحتنا على جنب".
واستكملت: "عارفين يعني إيه بعد ما ألبس فستاني أقلعه، بعد ما خلاص خطوة واحدة من 4 سنين مستنياه تبوظ بسبب الناس اللي نقلت كلام غلط، مش هقول الميديا، الميديا طول عمرها كدة وقبل ماشتغلها وأنا عارفة إنها كدة، نتكلم عن الناس الطبيعية، إزاي قدرتوا تشمتوا وتفرحوا في وجع غيركم واللي يدعي واللي يضحك واللي يقول أحسن، فهموني إنتوا بني آدمين؟، بتخافوا ربنا".
وأضافت: "طيب حتى لو نفرض وده فرضا إن حد من الطرفين غلطان، ليه الدعا عليه والحسبنة، أصله مش زرار هتقوم من النوم تدوس عليه فهتنسى العشرة والسنين وتقعد تدعي وتهين، لا أبدا مهما حصل بتلاقي نفسك مش طايق كلمة وحشة على الطرف التاني ونفس الكلام للطرف الآخر".
وتابعت: "بعد الهيصة والزيطة مابيفضلش غير الحلو، وبيبان الوحش بس كل اللي عايزة أقوله الشدة بتبين، في الآخر حبيت أخرج كلام جوايا من اللي شوفته اليومين اللي فاتوا، والله والله مافرق معايا غير فرحتنا أنا وهو".
وأوضحت: "مش أنا بس اللي اتكسرت، فستاني اللي قلعته، بدلته اللي اتقلعت، ومحدش فاهم حاجة، أهالينا اللي زعلانين علينا".
واستكملت: "ماكنتش ناوية أتكلم، بس كلام جوايا وكنت عاوزة أقوله محدش بيرضى في عشرة عمره لو عامل فيه إيه، مابيرضالوش الوحش ولا دعوة واحدة بالغلط، عشان محدش كان عارف إيه اللي حصل، معظم الناس أنا كنت هناك، أنا كنت حاضر، أنا كنت شاهد، كنت دعيت ربنا يهدي الدنيا ويجمعهم في الحلال، بدل ما كنت حكيت اللي سمعته مش اللي شوفته".
وأضافت: "فرحة فستان بتاعت الراديو راجعة راجعة إن شاء الله، هنحكي كل حاجة وهنقول كل حاجة، بس في الوقت اللي إحنا عايزينه، مش اللي الناس عاوزاه".
واختتمت حديثها: "نصيحة من قلبي لكل اتنين متجوزين عايزين يسيبوا بعض، لكل اتنين مخطوبين، لكل اتنين مخطوبين، لكل اتنين بيحبوا بعض، الحب مابيتبعش، ولو ضيعتوه والله ما بيجي تاني، امسكوا فيه مهما حصل، أكيد هنطلع ونتكلم، بس ادونا شوية فرصتنا مع بعض بعيدا عن الأضواء".