كاريزما الرئيس

ثورة 25 يناير صرفت العفريت حزنى مبارك ثم جاء الفاسدون وحضروا لنا "جان" اسمه عفرو شفيق رقص الجمل وكان ناقص يحلب البغلة ووزع بنبون فى ميدان التحرير.
حظه حلو أخذ الناقة وشرخ قبل الثوار ما يوزعوا عليه أرواح فى الإمام الشافعى، وأنا سمعت (دى إشاعة) إن الثوار كانوا ناويين يلبسوه جلابية وطاقية ويركبوه بالمقلوب حمار الفراعين الأزعر وفى إيده بطة مزغطة ويقولوا أبو الريش أخوه فى طره يعيش.
الشعب المصرى الشعب الوحيد اللى خلى أعتى فراعين مصر على مدى تاريخها حزنى مبارك يدور كعب داير من شرم الشيخ مرورا بالمركز الطبى العالمى، ثم طره ثم المعادى والله أعلم المحطة الجاية إيه.
إلى كل من أعطى صوته لعودة النظام السابق ورأس حربته شفيق أرجوكم اتحملوا شوية هانت فيه شباب استشهد عشان مصر تعيش فيه الشباب ونساء وأطفال أصيبوا بالعجز فى الجسد ونور العين عشان مصر تقف وتنهض وتبصر طريقها.
فى ناس فى مصر مدوا أيديهم فى صناديق زبالة الفاسدين عشان تأكل خاصة منهم فى ناس غطاؤها نجوم السماء وفرشتها تراب الأرض وفى ناس نسيت شكل اللحمة وحتى الفول خدوه منهم فى ناس عايشة فى مستنقع الحرمان والجوع والمرض والفقر، إيه الظلم وفزاعات، رعب، قتل ألك يكفكم كفى كفى.
عمالين تقولوا وتتشدقوا إن الإخوان بيوزعوا رشاوى للناس زيت وسكر وأرز ولحمة على الغلابة، وده كان قبل وبعد الثورة مين أحسن فيكم بتوزعوا على الغلابة كل أنواع الأمراض بلا علاج غوروا عننا بقى الله لا يرحمكم ويسلط عليكم من لا يخاف ألا تتعظوا أنتم ليس ببشر بل أنتم أبالسة وشياطين.
أصل ما فى ثورة 25 يناير أنها أعطت شعب مصر حبوب للشجاعة وكسحت برياحها العاتية كل الأقنعة عن وطاويط إعلام فاسد ونخبة أونطة فاسدة تمامًا وكشفت عوراتهم والغريب لسه بيقاوحوا.
إلى الذين يتحدثون عن كاريزما الرئيس بعد خطاب الرئيس محمد مرسى فى ميدان التحرير، والقسم أمام الثوار وضح جليا أنه أخذ من وطنية محمد فريد ومصطفى كامل وسعد زغلول وأحمد عرابى وشجاعة عبد الناصر ودهاء السادات والحمد لله لم يأخذ شيئا من صفات المخنوع.