ارتباك الأستاذ المتهم بسب الذات الإلهية بعد مواجهته بمنشوراته

واجه الإعلامي سيد علي - مقدم برنامج حضرة المواطن - الدكتور ماهر مصطفى المغربي - المتهم بسب الذات الإلهية بالمنشورات التي كتبها عبر حسابه ب"فيس بوك" .
وقال "المغربي" - خلال مداخلته: "أنا مستغرب من القصة دي كلها لأن الأكونت دة أصلًا أنا عملته من فترة طويلة جدًا واتهكر وأنا سيبته لأني مش عارف أعمل فيه حاجة .. لما لقيته اتهكر كدة قولت خلاص هعمل ايه؟ .. وعملت أكونت تاني وفضل كويس لفترة وبعدين اتقفل هو كمان فهجرت الفيس بوك كله ومعدتش بخش عليه خالص لا بطيب ولا برضي فمعرفش مين اللي نشر الكلام دة باسمي.. ومش أنا اللي كتبته".
و رد الإعلامي "سيد علي" قائلًا: "بس الكلام دة بيتنشر بقاله 3 شهور يافندم" .. ورد "المغربي": "مانا بقولك هو بقاله سنين طويلة الأكونت متهكر ومش عارف أعمل فيه ايه؟ .. والناس قالولي اتصل بمباحث الانترنت .. بس أنا مفهمتش لأني أصلًا مش كويس في حكاية النت دي ".
وقال "علي" : "كدة تبقى المسألة محلولة لو أنت بتنفي إنك عملت دة ".. وأجاب "المغربي" : "دة أكيد لكن محدش سألني في حاجة ولا حقق معايا ولا حد كلمني وفوجئت بالقرار بتاع الجامعة النهاردة .. هعمل ايه بقى".
و رد "علي" : "أنا حاطط البوستات على الشاشة والحقيقة شايف فيها كلام يُخرج من الإسلام" .. وعلق "المغربي": "لو دة كلام حقيقي ماشي لكن دة مكتوب على لساني غلط .. مش أنا اللي كاتبه".. وباغته "علي" بسؤال قائلًا: "طب مبلغتش عن الصفحة بتاعتك ليه" .. فرد: "مانا معرفش والله" .. فقال "علي": "يا فندم دا أنت أستاذ جامعي .. وممكن تبلغ حرس الجامعة أو أمن الجامعة ".. ورد "المغربي" منفعلًا: "يا مولانا الانترنت دة أنا جديد فيه .. أنا راجل عندي 66 سنة فكويس إني أعرف حاجة اسمها أكونت والكلام دة .. الأطفال الصغيرين بيعرفوا عننا .. والنهاردة واحدة من الأصدقاء قالي بلغ مباحث الأنترنت .. قولتله هي فين؟ .. قالي في القاهرة .. ومعرفتش أوصلها ازاي حقيقي فعلًا ".
وقال "علي": "أنا ليس من حقي التفتيش في إيمانك أو عدم إيمانك دة شيء يخصك وبين العبد وربه ولكن ثوابت الدين معلومة بالضرورة فهل حضرتك مؤمن بثوابت الدين وبقدرة الله سبحانه وتعالى وأنه قادر أن يقول للشيء كن فيكون؟ .. وأن كل شيء يجري في الكون بقدر؟ ".. فأجاب "المغربي": "أكيد طبعًا ".
الفيديو: