بالفيديو.. الحاجة زينب تصرخ: حسبي الله ونعم الوكيل في الحكومة

"ربنا ينتقم من اللي عمل الإزالة، والحكومة حسبي الله ونعم الوكيل فيها"، كلمات صرخت بها الحاجة زينب صاحبة أقدم محل ملابس في منطقة الوكالة.
وتضيف الحاجة زينب في حديثها ل"المصريون": "المحل عمره 85 سنة، أول محل في المنطقة من السبتية لغاية الطرابيشي أنا وارثاه أبا عن جد، إزاي يشيلونا من جدورنا، ويا ريت هيديونا حقوقنا، لا دول حرامية هيسرقونا، المتر هنا يجيب أكتر من 100 ألف جنيه وبيقولوا هيشتروا المتر من 5 ل 20 ألف نعمل بيهم إيه نجيب بيهم عشة فراخ ربنا ينتقم منهم، ويا تري هيودونا الصحرا ولا في عشوائيات".
وتابعت: "عندي 3 بيشتغلوا، اتنين منهم مطلقين وعندهم ولاد بيجروا عليهم، هيروحوا فين ويعملوا ايه يمشوا مشي بطال، وفي ملايين زيهم متشردين، وخصوصا بعد قرار تقليل العمالة من 7 مليون لمليون واحد بس، البلد كلها بطالة وهما عايزين يزودوها".
ووجهت حديثها إلي الحكومة قائلة: "حسبي الله ونعم الوكيل، النهاردة في دنيا بكرة في آخرة والملايين اللي عمالين تشردوهم هتتعلق في رقابيكم، ما فيش حاجة بتروح عند ربنا، ما تغركمش المناصب والكراسي اللي قاعدين عليها".
يذكر أن هيئة مترو الأنفاق أنذرت أصحاب محال بولاق أبو العلا لإخلاء محالهم للانتهاء من خط المترو الثالث.