نجل عم "الركايبي": الشهيد رفض ترك خدمته بعد سماع انفجار طنطا

قال أحمد الركايبي، نجل عم الرائد عماد الركايبي، والذي لقى مصرعه الأحد الماضى بتفجير الكنيسة المرقسية وسط الإسكندرية، إن نجل عمه كان باستطاعته ألا يكون في موقع التفجير في تأمين الكنيسة المرقسية، لكنه رفض وقال "ربنا يستر"، رافضًا أن يترك مكان خدمته.
وكتب فى تدوينة على "فيس بوك" "مع أني في الفترة الأخيرة مش بتكلم في أي حاجة بس اللي حصل ده لازم يخليك تتكلم ربنا يرحمك يا ابن عمي وبنحتسبك عند ربنا من الشهداءوربنا يصبرنا على فراقك في البلد دي".
وأضاف أن "فيه ناس بتقول إن ابن عمي حضن اللي كان داخل يفجر نفسه وفيه فيديو اللي كل الناس شافته والواد بيفجر نفسه عند البوابة وأنا بتكلم علشان مش عاوز حد يتاجر بدم واحد من أقرب الناس ليا ابن عمي بطل في نظري مش شرط أنه يحضن الإرهابي علشان يكون بطل".
وأشار"هو بطل علشان هو أنضف ضابط شفته في حياتي عمره ما جه على حد أو ظلم حد قدامي حصل أكتر من موقف كان ممكن يستخدم فيه "القانون" علشان يحبس ناس ولكن كان بيستخدم روح القانون وبيدي للمخطئ درسًا عمره ما ينساه".
وأكد أن "هو بطل علشان يوم الانفجار نازل من بيته الساعة 4 الفجر علشان يأمن الكنيسة مع أنه بكل سهولة كان ممكن مايروحش ومحدش في الشرطة كان حيقدر يكلمه علشان إحنا عيلة عندها كمية رتب مش طبيعية".
وقال عن الدقائق الأخيرة قبل مصرع الرائد عماد الركايبي أنه "هو بطل علشان قبل التفجير ب 10 دقايق كلمه السواق بتاعه وقاله في تفجير في طنطا يا باشا لو عاوزني أجيلك وتروح فقاله لا ربنا يستر وماسبش مكان خدمته وروح لأطفاله ال3 اللي مش حيشفوه ولا حيشفهم تاني".
وهاجم فى الوقت نفسه الذين يصفون نجل عمه بعدم البطولة قائلا"مش شرط أن انت تشوفه بطل ومايهمنيش انك تشوفه بطل بس ياريت تدعيله وتدعيلنا معاه ومتنساش إننا كعيلته ما تاجرناش بدم ابننا ولا عاوزين حد يتاجر بيه فياريت بلاش كلام انكم عاوزين تعملوا منه بطل وهو معملش حاجة إحنا فينا اللي مكفينا".