بالفيديو.. صانع شيشة ل"السيسي": حرام عليك خربت البلد ووقفت حالنا

"تعبان في حياتي، مش قادر أعيش، السيسي خرب البلد، ولادي سابوني وطفشوا".. كلمات صرخ بها "عم رجب"، الذي يبلغ من العمر 48 عاما، ولكنك عندما تنظر له من بعيد تعتقد أنه يعقد من عمره أكثر من ذلك، بسبب كثرة التجاعيد التي تكسو وجهه.
رجب عويس أبو حرب، أحد سكان قرية العجزية التابعة لمنطقة باب الشعرية، يسرد قصته ل"المصريون" قائلا: "أنت زي بنتي وعشان ارتحتلك هتكلم معاكي بصراحة وحاجه تانية بردو سبب إني أتكلم معاكي هي أن أنا عندي 48 سنة ومش مرتاح في دنيتي ولا في العيشة اللي عايشها".
وتابع وعينه تملؤها الدموع: "ولادي سابوني ومشيوا عشان مش قادر اصرف عليهم".
واستكمل حديثه: "أنا راجل على قد حالي ومش معايا مهنة أقدر اشتغلها وأعيش منها فكرت في إزاي أقدر أساعد نفسي واشتغل شغلانه يطلعلي منها اتنين تلاتة جنيه كل يوم وزى ما أنت شفتني قاعد في الشارع كده وجنبي شوية برطمانات زجاج وحبة بوص وابتديت بتصنيع الجوزة (الشيشة)"، وتابع: "على الحال ده بقالي 20 سنة، وكنت مبسوط وراضي برزقي اللي ربنا قسمه ليا".
وأضاف أبو حرب: "زمان كان تكلفت الشيشة الواحدة 2 جنيه وبعد ما السيسي قام بحكم البلد وغلى كل حاجة وصلت تكلفتها عليا 12 جنيه"، متابعا وملامح الحزن الشديدة تغطي وجهه: "يا بنتي والله أنا تعبت من العيشة اللي أنا عايشها دي ورميتي كده في الشارع واللي رايح واللي جاي يتعرض لي"، واستكمل: "من 3 أيام ضابط الشرطة اعتدى عليا وعملي محضر تسول وأنا بياع قاعد في الشارع".
وصرخ رجب في آخر الحديث قائلا: "يا ريت اللي أقوله ده يتذاع كامل.. انتخبت السيسي وكنت بقول هو ده رئيسي بس للأسف ندمت ندم عمري لأنه مطلعش رئيسي طلع هو اللي بيديني على دماغي وأنا واحد مش عاوز حاجة غير أن جيل الشباب اللي طالع ده يعيش عيشة كويسة مش يتبهدل زينا". مرددا: "أقسم بالله ياسيسي انك بعد مامسكت البلد انك خربتها وأنا عمري ما أفكر انتخبك تاني لو أترشحت مرة تانية لأني أقسم بالله مش عايزك".