والمصحف هندافع عن نفسنا وجاهزين ندفع التمن

فرغلي:

هدد البدري فرغلي - رئيس اتحاد أصحاب المعاشات - بالخروج في الشوارع بالملايين ، وذلك بعد قرار الحكومة بزيادة المعاشات بواقع 4 جنيهات وبنسبة تصل إلى 10% .
وقال "فرغلي" في لقاء مع الإعلامي "سعيد حساسين" : "احنا عايزين فوائد فلوسنا نعيش بيها مستورين ، ومطلبناش حاجة مش من حقنا ، لكنهم بيصورونا أننا بنضغط على الدولة والخزانة العامة ، وسيبتوا الناس اللي بتقبض مليون واتنين مليون في الشهر وسبتوا الناس تنهب في كل حتة ومحدش بيتكلم " .
وأضاف: "انتوا بتدوا 4 قروش في اليوم لأصحاب المعاشات .. دة اللي بيمسح سلالم لو عطيتهمله مش هيرضى واللي واقف يتسول لو حطيت في ايده 4 جنيه مش هياخدهم منك .. وبصراحة كدة احنا مش هنتعامل معاكم باللغة دي تاني ، أنا برفض أن احنا نكون بالشكل دة .. وبتقولوا إني بهدد ، والله العظيم احنا ما بنهدد ، دانا بأعلن التهديد ، والمصحف هنخرج في الشوارع والميادين ، واللي يموت يموت ، ونعيش بشرف أو نموت بشرف ".
وأردف: "احنا هندافع عن نفسنا وهنقاوم ، وأنا متوقع الخسارة، وإذا كنتوا عايزين التمن والمصحف احنا جاهزين للتمن" حسب تعبيره.
الفيديو: