محمد عادل: "مين لسه برة"

قائلا:"معانا دكتور ولواء ومهندس"..

نالت رسالة محمد عادل أحد أعضاء فريق "أطفال الشوارع" على موقع التواصل الاجتماعى "فيس بوك" تضامنا واسعا من قبل النشطاء والسياسيين.
وقال محمد فى تدوينته: "محدش يستهون بأي كلمة حتى ولو صغيرة لواحد مسجون، "شد حيلك" أو "ما تخافش"، أنا اعرف هنا ناس اللى مانعها تتجن أو تموت نفسها كلمة صغيرة من دول, أنا ببص على النتيجة ست سبع مرات ألاقيها نفس اليوم، زهقت، اليوم هنا فى السجن طويل لدرجة إني بنام وبقوم ست سبع مرات فى نفس اليوم".
وتابع: "فى السجن هنا رجالة بشنبات بتتكور تحت ملاياتها بالليل ويعيطوا السجن بيكسر الناس، أنا كل ما أتكور تحت ملاية أمي علشان اتكسر وأعيط أشم ريحة معفنة أروح قايم, أى هواية فى السجن مملة، القراية مملة، الكتابة مملة، الغنا ممل، الناس برا عايشة فى نعمة مش مقدرها، أكبر نعمة فى الكون إنك تقوم وتفتح باب الأوضة وتنزل الشارع".
واستطرد: "عدى علينا أكتر من خمسة جايين يقابلوا السيسى واتقبض عليهم عند قصر الاتحادية وجم بيّتوا هنا، واحد منهم مصمم إنو المهدى المنتظر، طمنى عليكوا برا، انتوا اتجننتوا؟, معانا دكتور اقتصاد ولواء جيش ومهندس ومترجم فى الداخلية وسكرتير نيابة ودكتور وممرض ورجل أعمال وشيخ أزهر، أنا نفسى أفهم مين لسه برة؟, فى ناس ما كنتش اتوقع أبدًا يجوا جم، وناس كنت مستنيهم يباتوا ليل نهار قدام القسم شوفت وشهم مرة صدفة كده وخلاص، الصحاب بيتغربلوا يا كبير".
وألقت الأجهزة الأمنية بالقاهرة، فى شهر مايو الماضي، القبض على فريق "أطفال شوارع"، لاتهامهم بتسجيل مقطع فيديو مسيء ومحرِّض ضد الدولة والرئيس عبدالفتاح السيسي.