محضر إثبات حالة

بتموت ف الزحمة حاجات
وحاجات كتير بتتغير..
واعمل إيه
وأنا شوية النفس اللى عندى
يادوب على أد الواد الصغير..
آخر القناديل
والونس
والعكاز..
يا طعم أحلى شوية شاى
فى الكوباية الإزاز..
محطات كتير فاتت..
عارف
الشكوى يا ابنى
أول ما تبقى محضر
ورقم ف دفاتر
تبقى ماتت..
معذور الظابط
لو مقدرش يشوفك
أو يسمع شكواك..
لا هو فاضى يتألم عشانك
ولا يقدر يضحك معاك..
معذور الظابط
والبدلة الميرى
ساعات بتكتف..
والدنيا مش على طول بتحدف..
بنى آدمين..
محدش فينا يا ابنى
بيختار الوقت
إمتى هايعشق
وهايعشق مين..
يارب
لو كان مكتوب علينا الفراق
يفضل ف قلوبنا حنين..
كل ما اقول هانت خلاص
ألاقى لسه المشوار طويل..
وكل ما اقول عطشان يا نيل..
أعطش زيادة..
تعالى فى حضن بابا
علمنى من تانى معنى الحياة
وقوللى إيه سر السعادة..