يامه

أنا حاسس إن الموت
ماخدش منك غير الطرحة
والجلابية السودة
ما أنا كل ما عدى جنب الأوضة
أسمع صوتك
وإنتى بتضحكى ع الدنيا
وبتدعى لى
روح
ربنا معاك
هاتسافر
وهاترجع مجبور الخاطر
وهاستناك
طب إسندى على كتفى
بكرة تقومى
بكرة تِخفّى
عارف مين يا ابنى بيقع ويقوم
إوعى تدور ع الدفا
فى فلوس وهدوم
ومتنساش تحوش شوية أصحاب
وافرح أوى لما يدق الباب
وتلاقى حد بيحضنك
لوجه الله
ياه
فاكره يامه لما كنتى
تعملى البصارة
وتدى منها لأبلة سارة
يرجع الطبق رز بلبن
يروح لأم حسن
يرجع صنية بسيسة
تدى منها لخالتى بيسة
ويرجع الطبق مليان حب
معقول كل ده قلب
عارفة يامه
النهارده بقيت بخاف بجد
بخاف من أى حاجة
ومن أى حد
بخاف غصب عنى
أتخبط ف حد
لحسن يعملى محضر
ويطلب تعويض
مشيت كتير يامه
بس الفرح لسه بعيد
يا ترى لسه بتدعى لى