«محمد وشروق في كل حتة في مصر».. مؤلف «كارثة طبيعية» يرد على جمهور السوشيال ميديا

كشف السيناريست أحمد عاطف فياض، كواليس كتابة مسلسله الجديد «كارثة طبيعية» بطولة الفنان محمد سلام، والذي يعرض حاليا عبر منصة «واتشات»، حول سيدة تلد 7 أطفال في آن وأحد و«محمد شعبان» زوجها شاب من أسرة بسيطة، يكافح لبناء حياته من الصفر وسط تحديات وضغوط يومية، ويفاجأ بحمل زوجته في 7 توائم، فيسعى رغم الظروف الاقتصادية القاسية لتأمين حياة كريمة لعائلته.
وقال «عاطف» عبر صفحته الرسمية بموقع «فيسبوك» معلقًا: «ناس كتير بتسألنى فكرة مسلسل كارثة طبيعية، جت في دماغك ازاى وإمتى وناس تانية مستغربين الفكرة أو فاكرينها فانتازيا!، هي الفكرة دى كانت عندى من قبل ما أكتب مسلسل بالطو أصلا ... وجاتلى الفكرة لما شوفت خبر بالصدفة على إحدى الصحف الإلكترونية عن ولادة سيدة شابة لخمس توائم في إحدى المحافظات ... ولفت نظرى الصورة اللى محطوطة في الخبر للأب والأم وهما شايلين الأطفال».
وأوضح :«حسيت وش الأب والأم في الصورة كأنه معجز جدًا مع إنهم شباب.. مفيش فرحة على وشهم تقريبا نفس وش محمد سلام في نهاية الحلقة التالتة وهو شايل الأطفال ومصدوم استغربت كمان لما لقيت الكومنتات على الخبر ده كلها ناس مبهورة من العدد وعمالين يهزروا ويقولوا في الكومنتات ايفيهات زى ايفيهات موظف السجل المدنى في المسلسل، ومفيش أي حد حتى دعا للأب والام ربنا يقويهم على الأقل ...
وتابع :«لأ ده فيه ناس كانت كاتبة في الكومنتات حاولوا تعملولهم حجاب عشان مايتحسدوش ... اللى هو كمان الناس هتحسدهم.. فحسيت إن الناس مش حاسة خالص بيهم أو بالمشاكل اللى هتقابلهم بسبب العدد الكبير ده من الأطفال اللى اتفاجئوا بيه مرة واحدة ومن هنا الفكرة نورت في دماغى ... بدأت أعمل سيرش عن الموضوع أكتر لقيت التوائم المتعددة دى» حالة نادرة بس بتحصل كتير «.... تقريبا في كل محافظة في مصر فيه محمد وشروق ... ومحدش فينا حاسس بيهم ولا بوجودهم ولا بالمشاكل اللى بيمروا بيها».
واستطرد: «فيه محمد وشروق في الغربية، ومحمد وشروق في بنى سويف وكفر الشيخ والبحر الأحمر وكل المحافظات، لو عملتوا سيرش في الجرايد بس، هتلاقوا حالات كتير جداً، ف فيه محمد وشروق في كل حتة تقريباً وسطنا فمبسوط جداً أن الناس بدأت تحس بمحمد وشروق في المسلسل ومتعاطفين معاهم وأتمنى كل الناس يتعاطفوا بردو مع الحالات اللى زيهم في الحقيقة».
واختتم: «ومش شرط الحالات اللى زيهم يكونوا ناس خلّفوا خمسة ولا سبعة أو ناس خلفوا أصلاً ... لا ممكن محمد وشروق يكونوا مرضى أو منكوبين أو حصلهم مشكلة كبيرة خارجة عن إرادتهم شقلبت حياتهم وضغطتهم ومحتاجين مساعدة واهتمام مننا كمجتمع ... ولو مش هنساعدهم على الأقل نحس بيهم وبظروفهم»