الشركة المنتجة لفيلم «السادة الأفاضل» تكشف عن البوستر الرسمي وموعد العرض

كشفت الشركة المنتجة لفيلم «السادة الأفاضل» بطولة محمد ممدوح وبيومي فؤاد، عن البوستر الرسمي للعمل، والذي من المقرر طرحه في دور العرض السينمائي داخل مصر يوم 29 أكتوبر الجاري، وفي الدول العربية يوم 30 أكتوبر.
أبطال «السادة الأفاضل» يكشفون تفاصيل أدوارهم
كشف نجوم فيلم «السادة الأفاضل» في فيديو تم نشره على الصفحات الرسمية للجهة المنتجة طبيعة أدوارهم بطريقة ساخرة جديدة هدفها الترويج للعمل، ولفت انتباه الجمهور للبحث حول مصداقية هذه الأدوار، ذلك تحت شعار «فيلم السادة الأفاضل هو فيلم فيه كل حاجة غلط».
وقال محمد ممدوح عن دوره: «أنا بلعب دور السير توماس أندريسون، دا آخر مندوب سامي بريطاني في مصر، وفي عهده تم الإنهاء تمامًا على الاحتلال البريطاني في مصر، والفيلم فيه صراع كبير في الشخصية بأنها هل تروح تعيش في لندن وشيفيلد وبترسول ولَّا تفضل عايشة في الطالبية والهرم والمغربلين».
أما هنادي مهنى فقالت: «بعمل دور كودية زار، ودول الناس اللي بتنظم للزار، في الأول بيحصلها حادثة بشعة بتخرج جن من زبون والجن بيحبها ويبلسها، الفيلم نقدر نقول عليه إن هو رعب، واحنا بصراحة مفقتدين جدا نوع الأفلام دي في السينما الأفريقية».
وكشفت ناهد السباعي عن طبيعة دورها قائلة: «بعمل دور مخرجة دنماركية بتقرأ كتاب عن خان الخليلي وبتنبهر جدا وبتقرر انها تنزل خان الخليلي عشان تصور فيلم تسجيلي هناك فيلم مستقل، أول ما بتنزل الخان الكاميرا بتتسرق منها ولما بتدور عليها بتدخل في الجريمة المنظمة للناس اللي بتتاجر في الكاميرات والعدسات وهتوصل لرئيس العصابة والراس الكبيرة ولا لأ؟ دا اللي هنشوفه في الفليم عشان مقدرش أحرق أكتر من كدا».
وقال أشرف عبدالباقي: «دوري شاب كان نفسه يبقى حكم كورة بس أهله كلهم أطباء بيطريين فهو دخل طب بشري، فضل شغفه أنه يبقى حكم كورة مستمر معاه لحد ما جاتله فرصة وبقي الطبيب المعالج في أحد فرق الكورة وأثناء ماتش من الماتشات المهمة جدا الحكم بيغمى عليه ويفشل إنه يعالجه والحكم بيوصيه وصية ويديله الصفارة السحرية وبيعرف أن الصفارة دي لو استخدمها في الدقيقة 72 وصفر بيها ضد فريق معين الفريق دا بيخسر وبيدخل بالصفارة دي عالم المراهنات ولجنة التحكيم لما بتعرف قصة الصفارة طبعا بيتضايقوا جدا لأن دي صفارة سحرية وأساسًا مش من مصر دي صفارة فرعوني».
من جانبها، قالت انتصار: «بعمل دور بنت ألمانية لها أصول ألبانية بتحب أوي سباق العربيات، بتسمع عن سباق جديد بيتعمل في العاصمة الإدارية والاهرامات وبتحجز طيران وتنزل على طول على مطار القاهرة، ومن المطار على العاصمة، وبتعمل حادثة مع تريلا، المهم لما بتفوق في أسرة ريفية بسيطة بتتلقاها وبتلاقي نفسها في الغيط بتقطف ملوخية وبتقابل حب حياتها وهنا بقي بتبدأ القصة بتاعتنا».
وروى بيومي فؤاد تفاصيل دوره في الفيلم قائلًا: «فيلم السادة الأفاضل بيتكلم عن الكهربائية، المهنة دي اتظلمت في السينما، ف احنا قولنا نسلط الضوء عليها، بما أنها كهربائية هنسلط الضوء، وبما أني كهربائي فأنا اسمي نور، الحقيقة مفيش حاجة صدفة كل شىء مدروس، بس مع أني كهربائي شاطر واسمي نور الدنيا مضلمة معايا شوية.. كل حاجة محسوبة الحمد لله في الفيلم دا.. يعني تحصل مفاجأة للكهربائي رايح عند زبون في يوم وبيفك دواية يلاقي فيها شريحة بتنقله نقلة تانية خالص لأنه بيقدر يكلم منها كل الشبكات ومجانًا حتى لو مفيش شبكة وبيروح يفتح سنترال في المرج وبيكسر الدنيا بقى.. مكالمات وشحن على الهوا».
وقال طه دسوقي: «متحمس جدًا للفيلم عشان دور فيه جديد جدا عليا، بعمل مهندس نانو تكنولوجي، اسمه دكتور جوهري، اكتشف طريقة جديدة لتوليد الطاقة عن طريق صابون المواعين السائل ودا طبعًا بيهدد مصالح ناس كتير جدًا ودول كتير وتشكيل إجرامي عالمي بيتابعه طول الفيلم وبيقفشوه قبل ما يسلم البحث دا للجهات المختصة وبيموت في الآخر.. فيلم دراما اجتماعي يعني».
تفاصيل فيلم «السادة الأفاضل»
الفيلم يضم الفنانين محمد ممدوح، بيومي فؤاد، طه دسوقي، محمد شاهين، أشرف عبدالباقي، انتصار، على صبحي، ناهد السباعي، هنادي مهنا، ميشيل ميلاد، إسماعيل فرغلي، حنان سليمان، دنيا ماهر ومن تأليف مصطفى صقر، محمد عز الدين، عبدالرحمن جاويش، وإخراج كريم الشناوي، ومن إنتاج بوليت بروف للإنتاج السينمائي، سي سينما برودكشن، فيلم سكوير، ريد ستار، بداية فيلمز، امباير.