شهادات جديدة عن أخطاء «مستشفى الدقي».. «عين راحت.. وحياة اتدمرت» (فيديو وصور)

«كنت داخلة المستشفى على رجلي وعيني فيها نور.. خرجت مش بشوف حاجة، حسيت إن حياتي انتهت وأنا لسه عايشة.. عين راحت وحياة اتدمرت».. بهذه الكلمات الممزوجة بالقهر والغضب بدأت نجاح ربيع عبداللطيف (65 عامًا) حديثها ل«المصرى اليوم»، لتلخص مأساة إنسانية عاشتها داخل أروقة مستشفى 6 أكتوبر التابع للتأمين الصحي بالدقي في الجيزة، بعدما دخلت لإجراء عملية إزالة مياه بيضاء بسيطة، فإذا بها تخرج بعين واحدة فقط.
مأساة ضحايا الإهمال الطبي في مستشفى 6 أكتوبر للتأمين الصحي
قصتها ليست استثناءً، بل جزء من سلسلة شهادات متشابهة لضحايا تخطت أعدادهم ال20، وفقًا لمصادر أمنية وقضائية تحدثت إلينا. النيابة العامة بدورها فتحت تحقيقًا موسعًا وأصدرت قرارات باستدعاء المرضى وأسرهم للاستماع إلى إفاداتهم، وسط مطالب متزايدة بمحاسبة الأطباء والمستشفى، وتوضيح أسباب ما وصفه الضحايا ب«الكارثة الطبية».
تحكي «نجاح» تفاصيل يوم دخولها المستشفى وكأنها تستعيدها لحظة بلحظة: «خلصت أوراقي وكل التحاليل اللازمة.. دخلت المستشفى 27 أغسطس الماضى عشان أعمل عملية مياه بيضاء.. وكل اللى اتمناه إن عيني تشوف أوضح.. بس اللي حصل قلب حياتي كلها».
خرجت من غرفة العمليات، فبدأت الآلام تنهش عينها اليمنى، حاول الأطباء طمأنتها بأن الأمر طبيعي، لكن الألم لم يكن «يُحتمل»، على حد تعبيرها: «رجعت بيتي في الحوامدية وأنا مش قادرة أفتح عيني.. كل ما أشتكي يقولولي خدي مسكن».
قصة نجاح ربيع التي فقدت عينها بعد عملية مياه بيضاء بسيطة
«دخلنا لإزالة مياه بيضاء وخرجنا بعين واحدة»… قصص ضحايا «مستشفى الدقي» تكشف كواليس الكارثة الصحية
في الجمعة التالية، قصدت المستشفى من جديد، ففوجئت برفض استقبالها: «قالولي مفيش طوارئ النهاردة»، تضيف بمرارة: «هو الألم بيستنى مواعيد المستشفى؟ أنا روحت ومش عارفة عيني فيها إيه».
تصف «نجاح» اللحظة التي فُكّت فيها الضمادة عن عينها: «لقيت الدم سايح منها، زي ما يكون العين بتتصفى.. الدكتور نفسه اتفاجئ وقال لازم تتحجز»، لكن ما تلا ذلك كان مجرد مسكنات، بلا تدخل حاسم- وفق حديثها.
«اللي وجعني مش بس الألم، الوجع إنهم سابوني كده.. لما ودوني قصر العيني، اكتشفت إن اللي اتعمل في المستشفى محتاج تصليح.. عملت 3 عمليات في فترة قصيرة.. والحقن اللي خدتُه عشان الالتهابات كان أقسى من العملية نفسها»، تروى «العجوز» في حزن.
بعدها، لم يكن أمام الأطباء خيار سوى «تفريغ العين» لإنهاء النزيف، تتنفس «نجاح» بصعوبة قبل أن تقول: «أنا دخلت بجوز عيون.. خرجت بعين واحدة.. وبنتي بتبص لي مش عارفة تواسيني.. أنا عايزة حقي».
تفاصيل تحقيقات كارثة مستشفى التأمين الصحي بالدقي
توجهت «نجاح» بنداء مباشر: «أناشد النائب العام ووزير الصحة.. مش عايزة اللي حصل يتكرر مع حد تاني.. أنا ست كبيرة، طب لو بنت صغيرة أو عروسة حصلها كده؟ مستقبلها يضيع.. ولو شاب لسه هيشتغل ويعول أسرته؟ الكارثة مش في عيني، الكارثة في اللي ممكن ييجي بعدي».
الحاج نبيل قاسم (65 عامًا) يعيش مأساة أخرى داخل مستشفى قصر العيني، لم يعد قادرًا على مغادرة سريره بعد أن أجريت له عملية في العين اليسرى انتهت بمضاعفات خطيرة.
ابنته تروي وهي تحبس دموعها: «إحنا روحنا المستشفى عشان عملية بسيطة.. بابا كان بيشوف كويس بعينه التانية وعايز يحافظ على عينه المصابة.. دلوقتي بنستنى قرار الأطباء بخصوص تفريغ العين، بعد ما استخرجوا منها أجسام غريبة زي أجزاء زجاجية زى ما قالولنا».
وتضيف: «أبويا راجل بسيط على المعاش.. ليه يحصل فيه كده؟ كنا متخيلين العملية هترجعه زي الأول، لقينا نفسنا بنفكر إزاي هنعيش من غيره لو فقد عينه، ده بيعول ولدين وزوجته».
وفق شهادات جمعتها «المصرى اليوم» من أسر متضررين، تجاوز عدد الحالات التي تعاني من مضاعفات مماثلة ال20 حالة، بعضهم فقد عينه بالكامل، وآخرون لا يزالون يخضعون لعمليات متكررة أو ينتظرون تدخلًا طبيًا قد ينقذ ما تبقى من إبصارهم.
«أنا مش لوحدي».. بهذه الجملة بدأت إحدى السيدات حديثها، وتابعت: «إحنا كتير.. كلنا كنا رايحين نفس المستشفى لنفس السبب.. وخرجنا بين عمايا ونزيف ومشاكل ملهاش حل».
النيابة تستدعي مسؤولي مستشفى 6 أكتوبر بعد الكارثة الطبية
مصادر قضائية أكدت أن النيابة العامة تلقت عشرات البلاغات من أهالي المرضى ضد إدارة المستشفى والأطباء القائمين على العمليات، وباشرت التحقيقات باستدعاء الضحايا وأسرهم، لبيان تفاصيل ما حدث داخل غرف العمليات.
كما خاطبت النيابة وزارة الصحة لسحب عينات من الأجهزة الطبية والأدوية التي استخدمت أثناء تلك العمليات، وفحصها بمعرفة لجان متخصصة، للوقوف على ما إذا كانت هناك أخطاء فنية أو تقصير مهني أدى إلى فقدان المرضى لأبصارهم.
وأمرت النيابة باستدعاء مسؤولي المستشفى والأطباء المشرفين على الحالات لسماع أقوالهم، تمهيدًا لتحديد المسؤوليات، وبيان ما إذا كان الأمر يتعلق بخطأ فردي أم خلل إداري ممنهج.
لم تكن «نجاح» و«نبيل» فقط هما من تحدثا إلينا، أحمد (42 عامًا)، أحد أقارب مريضة فقدت عينها، قال: «أختي دخلت عشان تشوف النور بعينها.. رجعت مش شايفة خالص.. بقينا نلف بيها على الأطباء من مستشفى لمستشفى».
الألم لم يكن جسديًا فقط، بل نفسيًا واقتصاديًا أيضًا، كثير من الضحايا تحدثوا عن اضطرارهم لترك أعمالهم بسبب فقدانهم الإبصار، ما أثر على دخلهم اليومي.
«أنا ست غلبانة».. تقول إحدى السيدات التي فقدت عينها: «كنت ببيع خضار عشان أصرف على بيتي.. دلوقتي مش قادرة أنزل السوق، ومش عارفة هأكل أولادي منين».
حتى كتابة هذه السطور، لا يزال الضحايا يتوافدون على مقر النيابة لتقديم إفاداتهم، ومن المقرر أن تستكمل النيابة جلسات سماع الشهادات خلال الأيام المقبلة، في حين ينتظر الأهالي نتائج الفحص الفني للأجهزة الطبية وتقارير اللجان.
الضحايا من جهتهم يواصلون نداءاتهم: «إحنا مش عايزين تعويض.. إحنا عايزين محاسبة».