«راح يطلب كرامة أمه.. فرجع في كفن».. قصة هشام الذي قُتل أمام والده في الهرم

لا تزال آثار الدماء باهتة على عتبة منزل تقطنه عائلة بسيطة في منطقة الهرم بالجيزة، فقدت أحد أبنائها في لحظة غدر.. «هشام»، الطالب بالسنة الثانية في كلية التجارة بجامعة حلوان، لفظ أنفاسه الأخيرة في مستشفى حكومى بعد ساعات من تعرضه لطعنة نافذة في الفخذ، إذ لم يكن الطالب الجامعي مشتبكًا في مشاجرة عشوائية، بل كان، بحسب والده، «رايح يطلب الاحترام لأمه.. فاتقتل على يد الجار».
«لو شوفتك تاني هرشّك بمية نار»
في البيت أقيم العزاء، جلس أسامة محمد أحمد، الوالد المكلوم، يروي تفاصيل ما حدث قبل أيام قليلة بصوت يكاد يُسمع، تخنقه العَبرة بين كل جملة وأخرى: «أنا راضي عن ابني.. بس عايز حقه.. اتقتل غدر، راح يعاتب، راح يطلب من جاره إنه يبطل يضايق والدته.. رجع لي جثة».
هشام، الشاب البالغ من العمر 20 عامًا، كان يساعد والده في إدارة مغسلة سيارات صغيرة يمتلكانها في الحي نفسه، بينما يُتابع دراسته الجامعية، لم يكن من أولئك الذين يميلون إلى المشكلات، وفق ما يرويه والده.. لكن تلك الليلة اختلفت عن سائر الليالي، إذ تحرك فيها دفاعًا عن الشرف والأمومة.
يقول الأب ل«المصرى اليوم»: «كنا راجعين من الشغل بالليل، حوالي الساعة 1 صباحًا، مراتي حكت لي إن إسلام، جارنا، كان بيعاكسها وهددها الصبح وقال لها (لو شوفتك تاني هرشّك بمية نار)، فراحت عملت محضر في القسم، بس ما حكتليش ولا لابني هشام إلا بعد ما رجعنا».
بعد سماع القصة، لم يحتمل «هشام» ما حدث، ترك والديه داخل البيت، وخرج في هدوء، دون أن يُخبر أحدًا بنيته، توجّه إلى باب الجار «إسلام»، شاب في ال 27 من عمره، بحسب رواية الأب، وطرق الباب، بنيّة العتاب لا أكثر: «ما كناش نعرف إنه نزل، فجأة اختفى، حسيت بيه، نزلت أجري أشوفه، لقيته واقف قدام بيت إسلام، واللي حصل بعد كده كان كارثة».
«ركبته عربيتي وجريت بيه على مستشفى الهرم»
بحسب «أسامة»، خرج الجار الشاب العشرينى من بيته ومعه أخوه، وكانا يحملان أسلحة بيضاء وسكاكين، في مشهد بدا وكأنه مُعد مسبقًا: «هشام لسه بيعاتب، لقيهم خرجوا عليه، إسلام ضربه في فخده اليمين، الطعنة كانت عميقة جدًا، وصلت شريان كبير موصل للقلب.. ابني نزل مكانه».
حاول الأب التدخل وإنقاذ ابنه، لكن الوقت كان قد تأخر: «شدّيت هشام معرفتش، العم جه زقني وقعني على الأرض، وأخو إسلام دخل في الخناقة، وابني وقع وقال (آه).. شفت الدم مغرق الأرض، كنت حاسس إني بموت جنبه».
يصف «أسامة» المشهد بأنه أسوأ من الكوابيس: «لقيت ابني غرقان في دمه، البركة كلها بقت دم، الناس بدأت تتجمع، وأنا صوتت للشارع كله، كنت شايل ابني بإيديا ومش قادر.. جسمه تقيل عليا».
في مشهد مأساوي آخر، قرر الأب أن لا ينتظر سيارة الإسعاف: «ركبته عربيتي وجريت بيه على مستشفى الهرم، وأنا كل شوية أقول له: استحمل يا ابني.. استحمل، بس هو كان بيغيب عن الوعي، وكان بيهمس بكلمات مش مفهومة».
«عايز إيه من والدتي؟»
وصل «هشام» إلى المستشفى وهو في حالة حرجة، دخل غرفة العمليات وظل الأطباء يحاولون إنقاذه لمدة 5 ساعات: «كان النزيف كبير أوي، والدكاترة كانوا بيقولولي: ادعيله، إحنا بنحاول نوقف النزيف بس الحالة خطيرة جدًا».
وبعد خروجه من العمليات، نُقل الطالب الجامعى إلى غرفة العناية المركزة، حيث بقي لساعات قليلة، قبل أن يصعد روحه إلى بارئها، ظهر يوم الجمعة الماضى: «قالوا لي إن الضربة كانت متعمدة، اللي ضربه كان عارف بيضرب فين.. ده مش خناقة، ده قتل متعمد».
يوضح الأب أن جذور الحادث تعود إلى ما قبل ساعات قليلة من الواقعة، حين تعرضت زوجته للتحرش والتهديد من الجار نفسه: «إسلام بيعاكس مراتي من فترة، وكانت بتخاف تحكي، ولما زاد الموضوع، خافت على نفسها وعلى بنتها، فرحت قسم الهرم الصبح وعملت محضر».
«ده كان سندي»
يضيف: «اللي قهرني إن ابني نزل يدافع عن كرامة أمه من غير ما يقصد مشكلة، نزل بس يسأله: (أنت عايز إيه من والدتي؟).. لكنه ما رجعش».
حين يُسأل «أسامة» عن ابنه المجنى عليه، يختصر الإجابة بجملة واحدة: «أنا ربيت، وهو طلع راجل بيغير على بيته».
كان «هشام»، بحسب شهادة والده، شابًا هادئًا، يحرص على العمل والتعليم معًا، يتحمّل المسؤولية ولا يفتعل المشكلات: «ابني ماكانش بيحب العنف، بس في الليلة دي حس بالإهانة.. حس إنه لازم يقف، بس للأسف.. دفع حياته».
ويضيف: «ده كان سندي، مش بس ابني، كنت بقول عليه ضهري.. وبقى حلمي أشوفه بيكمل جامعته، بيتجوز، يفرح.. بس كله راح في لحظة».
«هشام مات راجل»
أُلقي القبض على المتهم، بحسب مصادر أمنية، ويجري التحقيق معه في تهمة القتل العمد، خصوصًا بعد وجود شهود وتسجيلات كاميرات قريبة من موقع الحادث، وتشير التحقيقات الأولية إلى أن الجريمة لم تكن بدافع اللحظة.
لكن بالنسبة لوالد المجنى عليه، فإنه يأمل في سرعة المحاكمة وتحقيق القصاص العادل: «أنا مش ههدى غير لما يتعاقب، مش عايز غير القانون ياخد مجراه، والمتهم يتعدم.. أتمنى أشوفه قدام عيني، زي ما أنا شفت ابني بيموت قدامي».
ويختم بصوت منكسر: «كل لحظة بتمر بحس بوجع جديد، بس راضي عن ابني.. هشام مات راجل».