«الابن الوحيد لوالديه».. «الونش» ينهي حياة جاره في الوراق بسبب صوت الميكروفون (القصة كاملة)

مقعد «كريم»، سائق «ميكروباص»، الشاغر في المنزل، ينظر إليه والده: «مش مصدق إنه اتقتل وراح منى»، وتدمع عيناه: «ده ابنى الوحيد اللى طلعت بيه من الدنيا». الصدمة تعلو وجه الأب منذ سماعه صراخ الجيران، ولما نزل إلى الشارع محل سكنه في الوراق بالجيزة، يستطلع الأمر: «مكنش في بالى إن يكون ابنى مضروب بالمطواة»، ويقول إنه فوجئ بالجار، «رمضان الونش»، عاطل، يلوح بسلاحه مهللًا بين الناس: «أنا اتْصَيَّتّ»، وإذا بوالد السائق يعثر على جثمان الابن وبه 3 طعنات بصدره وبطنه وفخذه، يصرخ كأنه جُن: «الواد اللى حيلتى راح» ليحكى سبب الجريمة: «ابنى عاتب الجار من كام يوم عشان مسك ميكروفون بتاع راجل ماشى على عربية كارو يبيع خُردة، وقعد يتكلم فيه بالليل وسيدة مسنة قالت له مش عارفة أنام، فتربص له».
3 طعنات تنهي حياة «كريم»
ويرفع والد «كريم» يده عاليًا، يدعو لابنه، 22 عامًا: «ربنا يوسع عليك.. ويكفيك شر ولاد الحرام»، بينما الابن يغادر المنزل إلى عمله، قبل أن يقف عند عربة فول يتناول إفطاره الذي يليه احتساء كوب شاى على المقهى، حيث التقى بالجار «الونش»، وتبادلا النظرات، وكلاهما أضحى يقول للآخر: «بتبص لى»، وفق ما جاء بتحريات أجهزة الأمن لتدور مشاجرة بينهما، على أثرها قُتل السائق.
في رواية أسرة الشاب العشرينى، فإنه قصد منزل «الونش» لينادي على أمه، قائلًا لها: «شوفى ابنك عمال يضايقنى، عشان قلت له عيب تزعق في الميكروفون، والست الكبيرة جارتنا مش عارفة تنام»، وما هي إلا ثوانٍ حتى فتح الجار «مطواة» كانت بحوزته، وقال له: «هقتلك»، ليطعنه 3 طعنات في الصدر والظهر والفخذ اليمنى، حسب والد المجنى عليه: «قطع شريان يؤدى إلى القلب، كان السبب في الوفاة».
«يا كريم عايز أفرح بيك»
تجاعيد وجه «العجوز»، التي دافع عنها «كريم»، مليئة بالحزن، ترتعش يداها، وهى تشير إلى أنها تعيش وحيدة وصاحبة مرض، وأن «الواد اللى مسك الميكروفون قعد يشتم في الناس، في نصف الليل، وصاحب العربية الكارو مكانش قادر عليه، فتحت الشبّاك لقيته عمال يزعق ويغنى، قلت له: (يا ابنى عايزة أنام).. واصل اللى بيعمله، لما الشاب التانى قاله بلاش غنا وزعيق، فقاله: (هقتلك)، وإحنا قلنا كلام وخلاص».
في اليوم التالى، طلت المسنة مثل غيرها من الشرفة، وطالعت «كريم» مضرجًا في دمائه قتيلًا، ظلت تبكيه وتقول: «ده شهيد، اتغدر بيه»، وهكذا أيضًا كان حال أفراد أسرته التي صُدمت لإزهاق روحه لسبب يصفونه ب«التافه»، فهذا عمه يحكى: «كنت نازل من بيتى، لقيت جارنا (الونش) في وجهى، بقوله: بتجرى كده ليه، وسلمت عليه، ومكنتش أعرف إنه ضارب ابن أخويا وموّته»، وتلك زوجة عمه التي توجهت إلى السوق صباحًا: «سمعت صراخ وصويت، وبعدها شفت ابن سلفى، الناس حواليه، وبيطلّع في الروح»، بخلاف الأب الذي نزل للشارع: «أشوف فيه إيه، ولا كان في دماغى يكون ابنى بيتخانق مع حد، لقيته جثة هامدة».
مشهد الأب وهو يحتضن جثمان ابنه، والدماء تلطخ ملابسه، لم ينسَه أولاد منطقته، ويحكى عنه لتشعر كأنه إزاء مشهد درامى: «جريت على المستشفى، اللى تبعد عنى مسافة أمتار، وعارف وشايف ابنى ميت، كنت أرجو الدكاترة: (ابنى الوحيد، اعملوا معجزة عشان يصحى، مليش غيره ولا عندى سند ولا حد بياخد بحسى غيره هو»، ثم وقف يجهش باكيًا أمام ثلاجة حفظ الموتى، بعدما أكد له الأطباء الوفاة وأن قطع شريان يصل للقلب السبب: «يا حبيبى قوم لى، يا كريم عايز أفرح بيك، قطعت بيا، لا هتتجوز وتخلف، ولا حد هيشيل اسمى، وتسيبنى وتمشى»، مرددًا: «عايز حقه».
«عوّرت (كريم) وهتْصَيّت»
ويصر والد المجنى عليه على أن يعرف حقيقة ما حدث، ويرى في كاميرات المراقبة: «ابنى راح لأم جارنا يشكو لها، وبعدين رجع عند القهوة، ولما (الونش) طلع المطواة، حاول يدافع عن نفسه، وخبطه بكرسى، بس التانى اداه طعنتين والتالتة في فخده، وقع مات في ساعتها»، ويروى أن «(كريم) كان بيقولِّى: (يا بابا في الرايحة والجاية، الواد بيقولِّى: (هقتلك).. مكنتش باخد في بالى، بس عملها».
الأهالى يشهدون بأن «الونش» اعتاد المشى بالسلاح الأبيض والتلويح ب«المطواة»، وأبدوا مشاعر كراهية تجاه سلوكه، فيما أبدوا تعاطفًا مع المجنى عليه: «فى حاله من البيت على الشغل، وبيراعى أبوه وأمه».
في ذلك التوقيت، كانت وحدة مباحث قسم شرطة الوراق قد تلقت إشارة بوصول سائق «ميكروباص» جثة هامدة، ادعاء مشاجرة مع جاره، الذي لاذ بالفرار، لينتقل رئيس المباحث محمد طارق، برفقة معاونه النقيب مهند زاهر، إلى مكان الحادث، وعملا على تفريغ كاميرات المراقبة وسؤال شهود العيان وغيرهما من الإجراءات اللازمة لكشف ملابسات الواقعة، وأعدا الأكمنة الثابتة والمتحركة لضبط المتهم «الونش»، الذي كان يظن أنه وفق قوله: «عوّرت (كريم)، وهتْصَيّت، والناس هتخاف منى»، ونجحت الشرطة في ضبطه، وأقر بجريمته، وأرشد عن «المطواة» المستخدمة في الجريمة، وقررت النيابة العامة حبسه 4 أيام احتياطيًّا.