بمناسبة عيد ميلاده ال85.. محمود سعد عن عادل إمام :«كنت بسمع إن القعدة معاه خطر»

كشف الإعلامي محمود سعد عن تفاصيل صداقته الطويلة مع عادل إمام وذلك بمناسبة عيد ميلاده ال85، والتي امتدت لأكثر من 35 عامًا، معبّرًا عن امتنانه العميق لهذه العلاقة القوية التي جمعتهما، رغم أنه لم يسبق له التعاون معه فنيًا.
وقال محمود سعد، في مقطع فيديو نشره عبر حسابه الرسمي على موقع «فيسبوك»:«عادل إمام كان دايمًا بيرد على التليفون، ودلوقتي مبقاش يستخدمه خالص، وكلمت أخوه النهارده وقولتله يقوله كل سنة وأنت طيب يا عدولة يا أبورامي، وربنا يسعده مع أولاده وأحفاده».
وأشار محمود سعد إلى أن الزعيم منحه ثقة ومساحة خاصة طوال سنوات صداقتهما، قائلًا: «كنت أقدر أدخل كواليس مسرحه في أي وقت، رغم أن ذلك كان ممنوعًا تمامًا لأنه بيتشتت بوجود أي شخص، لكنه كان بيسمحلي أنا بس، وده معناه قد إيه كان بيثق فيا».
وتابع: «أكتر من 10 سنين، أي زميل عايز يقابل عادل إمام كان بيكلمني علشان أوصله، رغم إني ماشتغلتش معاه، لكنه كان شايفني من دائرته القريبة».
وأضاف :«كنت أسمع إن القعدة مع عادل إمام خطر، لأنه ممكن يقولك كلمة تخلّيك متعرفش ترد، مش خوفًا، لكن لأنه شديد الذكاء وسريع البديهة».
وفي ختام حديثه، وجه محمود سعد رسالة للزعيم قائلًا: «كل سنة وأنت طيب يا عادل، ربنا يديمك لينا وتفضل دايمًا مصدر بهجة لملايين الناس».