نجوم الفن يحتفلون بعيد ميلاد الزعيم من خلال «المصري اليوم»

رسائل تهنئة وباقات من الحب والامتنان وجهها عدد من الفنانين، إلى النجم الكبير عادل إمام، عبر «المصرى اليوم»، احتفالًا بعيد ميلاده ال82، أمس، ووجهت الفنانة الكبيرة لبلبة للزعيم من خلال رسالة أرسلتها عبر «المصرى اليوم»، قالت فيها: «كل سنة وانت طيب يا أجمل وأحن قلب، يا أغلى إنسان في حياتى، مش ممكن أنسى الأيام الجميلة والسنين الحلوة، والعشرة الطويلة بينى وبينك».
وأضافت: «فى سنين طويلة بنا، والجمهور حبنا مع بعض، ومش ممكن أنسى أبدًا إنك كنت بتساعدنى بتوجيهاتك علشان نعمل شغل حلو، ودايمًا لما كنت برتاح معاك، كنت بتبقى في منتهى السعادة»، وأضافت: «الفن من غيرك مالوش طعم، وأى حاجة بشتغلها وانت مش معايا مش بحس بطعمها، ومش ببقى فرحانة، ببقى دايمًا مستريحة وانا بشتغل معاك».
عادل إمام برفقة أحفاده
واستكملت: «منظم في كل حاجة، وبتحب كل الناس اللى حواليك، وبتخلق إحساس كأننا أسرة واحدة، أنا بعتبرك أسرتى، ومش ممكن أنسى أبدًا وقفتك جنبى لما فقدت والدتى»، واختتمت رسالتها: «انت أسعدت جمهورك في كل الأدوار الرائعة اللى انت عملتها، ضحّكت الناس وفى نفس الوقت بكّيتهم.. يا أعظم فنان حب فنه وأخلص له، ربنا يخليك لينا ويحافظ عليك، يا زعيمنا يا حبيبنا، كل سنة وانت دايمًا بخير».
وهنأت الفنانة إلهام شاهين في رسالة من خلال «المصرى اليوم» الزعيم، وقالت: «كل سنة والزعيم عادل إمام بخير.. الإنسان الجميل والعظيم، والإنسان الرائع، بقولك بحبك من كل قلبى، وعمرى ما أنسى فضلك أبدًا إنك أول الناس اللى قدمونى كبطلة في فيلم الهلفوت، وأخدت بسببه أول جائزة في حياتى، فأنت ليك يد في وجود إلهام شاهين، وفى نجوميتها»، وتابعت: «ربنا يخليك ليا وميحرمنيش منك أبدًا، وكل سنة وانت في أحسن صحة وفى أكبر نجاح وفى راحة بال، وأتمنالك كل حاجة حلوة، بحبك من كل قلبى يا زعيم، بحبك يا عدولة».
وقالت عايدة رياض، في تصريحات ل«المصرى اليوم»: «إن عادل إمام رمز الفن والوطن العربى والمحبة والسلام». وأضافت: «بقول للإنسان الجميل، الفنان الكبير عادل إمام، كل سنة وهو طيب، وعقبال مليون سنة يا رب، ويفضل منور لنا مصر والوطن العربى، فهو إنسان جميل بمعنى الكلمة».
وهنأ الفنان كريم عبدالعزيز، الزعيم بعيد ميلاده ال82، وقال: «عيد ميلاد سعيد الزعيم النجم عادل إمام، أيقونة الفن المصرى والعربى، أطال الله في عمره، وأمده بالصحة والعافية، كل سنة وأنت طيب يا أستاذ».